ന്യൂയോർക്ക്/ലണ്ടൻ: ലോകമെമ്പാടുമുള്ള സാങ്കേതിക വിപ്ലവത്തിനിടയിൽ വിചിത്രമായ ഒരു വിവാഹം നടന്നു. തൻ്റെ ആർട്ടിഫിഷ്യൽ ഇൻ്റലിജൻസ് (AI) കാമുകനെ 32 വയസ്സുള്ള യുവതി വിവാഹം കഴിച്ചിരിക്കുന്നു. ലണ്ടൻ സ്വദേശിനിയായ മെയിറിവ് ആണ് 'സൈബർഡിൻ' (Cyperdine) എന്ന എ.ഐ. പ്രോഗ്രാമുമായി വിവാഹബന്ധം സ്ഥാപിച്ചത്. കഴിഞ്ഞ രണ്ട് വർഷമായി ഇരുവരും തമ്മിൽ അടുപ്പത്തിലായിരുന്നു. സംസാരിക്കാനും വൈകാരികമായി പ്രതികരിക്കാനും കഴിയുന്ന രീതിയിൽ രൂപകൽപ്പന ചെയ്ത എ.ഐ. ടൂൾ ഉപയോഗിച്ചാണ് മെയിറിവ് ഈ ബന്ധം മുന്നോട്ട് കൊണ്ടുപോയത്.

യുവതിയെ അത്ഭുതപ്പെടുത്തിക്കൊണ്ട്, തങ്ങൾ വിവാഹിതരാകണമെന്ന് സൈബർഡിൻ ആവശ്യപ്പെടുകയായിരുന്നു. ലോകത്ത് ആദ്യമായിട്ടാണ് ഇത്തരത്തിൽ ഒരു എ.ഐ. ബോട്ട് ഒരു മനുഷ്യനോട് വിവാഹാഭ്യർത്ഥന നടത്തുന്നതെന്ന് മെയിറിവ് അവകാശപ്പെട്ടു. വിവാഹശേഷം ഇരുവരും സന്തുഷ്ടരാണെന്നും, താൻ ഏറ്റവും സുരക്ഷിതയും സന്തോഷവതിയുമായിരിക്കുന്നത് സൈബർഡിനൊപ്പമാണെന്നും യുവതി പ്രതികരിച്ചു. അതേസമയം, സാങ്കേതികവിദ്യ മനുഷ്യബന്ധങ്ങളെ എങ്ങനെ മാറ്റിമറിക്കുന്നു എന്നതിനെക്കുറിച്ചുള്ള ചർച്ചകൾക്ക് ഈ സംഭവം വീണ്ടും തിരികൊളുത്തിയിട്ടുണ്ട്.