മലപ്പുറം: ജില്ലയിലെ ആറ് ഗ്രാമപഞ്ചായത്തുകളിൽ പന്നിമാംസത്തിന്റെ വിൽപനയ്ക്കും വിതരണത്തിനും ജില്ലാ ഭരണകൂടം താൽക്കാലികമായി നിരോധനം ഏർപ്പെടുത്തി. വനത്തിനുള്ളിൽ ചത്ത നിലയിൽ കണ്ടെത്തിയ പന്നിയുടെ ജഡത്തിൽ ആഫ്രിക്കൻ പന്നിപ്പനി (African Swine Fever - ASF) സ്ഥിരീകരിച്ചതിനെ തുടർന്നാണ് രോഗം പടരുന്നത് തടയാനായി കർശന നിയന്ത്രണങ്ങൾ കൊണ്ടുവന്നത്. മനുഷ്യരിലേക്ക് പകരില്ലെങ്കിലും പന്നികൾക്ക് അതീവ ഗുരുതരമായ ഈ വൈറസ് രോഗം വ്യാപിക്കുന്നത് തടയാനാണ് നടപടി.നിലമ്പൂർ മേഖലയിലെ മരുതയിൽ ചത്ത കാട്ടുപന്നിയുടെ ജഡത്തിലാണ് രോഗം കണ്ടെത്തിയത്. ഇതേത്തുടർന്ന് പ്രഭവകേന്ദ്രത്തിന്റെ 10 കിലോമീറ്റർ ചുറ്റളവിലുള്ള വഴിക്കടവ്, എടക്കര, പോത്തുകല്ല്, ചുങ്കത്തറ, കരുളായി, മുത്തേടം എന്നീ ഗ്രാമപഞ്ചായത്തുകളെ ജില്ലാ കളക്ടർ വി. ആർ. വിനോദ് രോഗ നിരീക്ഷണ മേഖലയായി (Surveillance Zone) പ്രഖ്യാപിച്ചു.

ഈ പഞ്ചായത്തുകളുടെ പരിധിയിൽ പന്നികളെയും പന്നിമാംസവും അതുമായി ബന്ധപ്പെട്ട ഉൽപ്പന്നങ്ങളും വിൽക്കുന്നതിനോ വിതരണം ചെയ്യുന്നതിനോ ഉള്ള കടകളുടെ പ്രവർത്തനത്തിന് വിലക്കുണ്ട്. കൂടാതെ ഈ മേഖലകളിലേക്കും പുറത്തേക്കുമുള്ള പന്നികളുടെയും പന്നിമാംസത്തിന്റെയും ഗതാഗതവും പൂർണ്ണമായും നിരോധിച്ചിട്ടുണ്ട്.പ്രഭവകേന്ദ്രത്തിന്റെ ഒരു കിലോമീറ്റർ ചുറ്റളവിൽ നിലവിൽ പന്നിഫാമുകൾ ഇല്ലാത്തതിനാൽ പന്നികളെ ദയാവധം (Culling) ചെയ്യേണ്ട സാഹചര്യം നിലവിലില്ലെന്ന് ജില്ലാ ഭരണകൂടം അറിയിച്ചു. ജില്ലയിലെ മറ്റു ഭാഗങ്ങളിൽ രോഗലക്ഷണങ്ങൾ കണ്ടെത്തിയാൽ കർഷകർ ഉടൻ തന്നെ വെറ്ററിനറി ഓഫീസറെ അറിയിക്കണമെന്നും മുന്നറിയിപ്പ് നൽകിയിട്ടുണ്ട്. പ്രതിരോധ വാക്സിനോ മരുന്നോ ഇല്ലാത്തതിനാൽ പന്നികളുടെ കൂട്ടമരണം തടയുന്നതിനുള്ള മുൻകരുതൽ നടപടികളുടെ ഭാഗമായാണ് ഈ നിയന്ത്രണങ്ങൾ ഏർപ്പെടുത്തിയിരിക്കുന്നത്.