കൊച്ചി: ശബരിമല സന്നിധാനം, പമ്പ, എരുമേലി എന്നിവിടങ്ങളിൽ രാസവസ്തുക്കൾ ഉപയോഗിച്ച് നിർമ്മിച്ച കുങ്കുമം വിൽക്കുന്നത് ഹൈക്കോടതി വിലക്കി. പരിസ്ഥിതിക്ക് ദോഷകരമായ ഉൽപ്പന്നങ്ങൾ ശബരിമല തീർത്ഥാടന മേഖലയിൽ ഉപയോഗിക്കുന്നതും വിൽക്കുന്നതും തടയുന്നതിന്റെ ഭാഗമായാണ് ഹൈക്കോടതിയുടെ ദേവസ്വം ബെഞ്ച് ഈ ഉത്തരവ് പുറപ്പെടുവിച്ചത്. വിലക്ക് കർശനമായി നടപ്പാക്കണമെന്ന് കോടതി തിരുവിതാംകൂർ ദേവസ്വം ബോർഡിന് നിർദ്ദേശം നൽകി.

മണ്ഡല-മകരവിളക്ക് തീർത്ഥാടനത്തിന് ദിവസങ്ങൾ മാത്രം ശേഷിക്കെയാണ് ഈ സുപ്രധാനമായ വിധി വന്നിരിക്കുന്നത്. പേട്ട തുള്ളലിന് ഉൾപ്പെടെ ഭക്തർ ഉപയോഗിക്കുന്ന രാസ സിന്ദൂരങ്ങൾ ഗുരുതരമായ ആരോഗ്യ-പാരിസ്ഥിതിക പ്രശ്നങ്ങൾ ഉണ്ടാക്കുന്നതായി നേരത്തെ റിപ്പോർട്ടുകൾ ഉണ്ടായിരുന്നു. രാസ കുങ്കുമത്തിന് പകരം ജൈവ സിന്ദൂരമാണ് ഭക്തർ ഉപയോഗിക്കേണ്ടതെന്ന നിർദ്ദേശങ്ങൾ നേരത്തെ നിലവിലുണ്ടായിരുന്നെങ്കിലും, നിരോധനം ലംഘിച്ച് രാസ സിന്ദൂരത്തിന്റെ വിൽപന വ്യാപകമായിരുന്നു. ഈ പശ്ചാത്തലത്തിലാണ് ഹൈക്കോടതിയുടെ കർശന ഇടപെടൽ.

പരിസ്ഥിതിക്ക് വിനാശകരമാകുന്ന പ്ലാസ്റ്റിക് ഷാമ്പൂ സാഷെകൾക്ക് ശബരിമലയിൽ വിലക്ക് ഏർപ്പെടുത്തിയതിന് പിന്നാലെയാണ് രാസ കുങ്കുമം വിലക്കിയുള്ള കോടതിയുടെ നടപടി. ഖരമാലിന്യം നിക്ഷേപിക്കുന്നത് തടയാൻ എരുമേലി ഗ്രാമപഞ്ചായത്ത് കർശന പരിശോധന നടത്തണമെന്നും കോടതി നിർദ്ദേശിച്ചിട്ടുണ്ട്.