കേരളത്തിൽ എയിംസ് (AIIMS) സ്ഥാപിക്കുന്നതുമായി ബന്ധപ്പെട്ട് നിലപാട് കടുപ്പിച്ച് കേന്ദ്രമന്ത്രി സുരേഷ് ഗോപി എം.പി. സംസ്ഥാനത്ത് എവിടെയെങ്കിലും എയിംസിന് തറക്കല്ലിടാതെ ഇനി താൻ വോട്ടഭ്യർത്ഥിച്ച് വരില്ലെന്ന് അദ്ദേഹം ആവർത്തിച്ചു. കമ്യൂണിസം കാരണം തകർന്നുപോയ ആലപ്പുഴയെ പടുകുഴിയിൽ നിന്ന് കരകയറ്റാൻ വേണ്ടിയാണ് എയിംസ് അവിടെ സ്ഥാപിക്കണമെന്ന് താൻ അന്നുമുതൽ ആവശ്യപ്പെടുന്നതെന്നും അദ്ദേഹം വ്യക്തമാക്കി.ആലപ്പുഴയിൽ എയിംസ് അനുവദിക്കാൻ തടസ്സം നിൽക്കുകയാണെങ്കിൽ, തൃശൂരിനുവേണ്ടി താൻ ആവശ്യമുന്നയിക്കും.

"എയിംസ് തൃശൂരിനു ലഭിക്കാൻ സാധ്യതയുണ്ടോ എന്നു ചോദിച്ചാൽ എം.പി. എന്ന നിലയിൽ എന്റെ അവകാശമാണത്, ഞാനത് ആവശ്യപ്പെടുക തന്നെ ചെയ്യും. എന്നാൽ, ആലപ്പുഴയുടെ ഉദ്ധാരണമാണ് പ്രഥമ ലക്ഷ്യം," അദ്ദേഹം പറഞ്ഞു. എയിംസ് ആലപ്പുഴയിൽ ലഭിച്ചില്ലെങ്കിൽ തൃശൂരിന്റെ 'തണ്ടെല്ല് കാണിക്കും' എന്നും അദ്ദേഹം മുന്നറിയിപ്പ് നൽകി. 'ഞാൻ ഒറ്റത്തന്തയ്ക്കുണ്ടായവനാണ്. അന്നു പറഞ്ഞതുതന്നെ ഇപ്പോഴും പറയുന്നു,' എന്നും അദ്ദേഹം കൂട്ടിച്ചേർത്തു. കോഴിക്കോട് എയിംസ് സ്ഥാപിക്കാൻ സംസ്ഥാന സർക്കാർ സ്ഥലം കണ്ടെത്തിയിട്ടും സുരേഷ് ഗോപി ആലപ്പുഴയ്ക്കായി വാദിക്കുന്നത് അനാവശ്യ വിവാദമുണ്ടാക്കാനുള്ള ശ്രമമാണെന്ന് സി.പി.എം. ഉൾപ്പെടെയുള്ള ഭരണകക്ഷി നേരത്തെ വിമർശനം ഉന്നയിച്ചിരുന്നു.