പത്തനംതിട്ട: ശബരിമല ക്ഷേത്രത്തിലെ ദ്വാരപാലക ശിൽപ്പങ്ങളിലെ സ്വർണപ്പാളികൾ കാണാതായതുമായി ബന്ധപ്പെട്ട കേസിൽ പ്രത്യേക അന്വേഷണ സംഘം (എസ്.ഐ.ടി.) മുൻ തിരുവാഭരണം കമ്മീഷണർ കെ.എസ്. ബൈജുവിനെ അറസ്റ്റ് ചെയ്തു. കേസിൽ അറസ്റ്റിലാകുന്ന നാലാമത്തെ ഉദ്യോഗസ്ഥനാണ് ഇദ്ദേഹം. സ്വർണപ്പാളികൾ ക്ഷേത്രത്തിൽ നിന്ന് നീക്കം ചെയ്യുന്ന സമയത്ത് കമ്മീഷണർ എന്ന നിലയിൽ മേൽനോട്ടം വഹിക്കുന്നതിൽ ബൈജുവിന് ഗുരുതര വീഴ്ച സംഭവിച്ചുവെന്നും, സ്വർണം കാണാതായ സംഭവത്തിൽ ഇദ്ദേഹം അറിഞ്ഞുകൊണ്ട് നടപടിക്രമങ്ങളിൽ വീഴ്ച വരുത്തിയതായും എസ്.ഐ.ടിയുടെ കണ്ടെത്തൽ. കേസിന്റെ അന്വേഷണ ഭാഗമായി പലതവണ ചോദ്യം ചെയ്യലിന് ഹാജരാകാൻ ആവശ്യപ്പെട്ട ബൈജുവിനെ വിശദമായ ചോദ്യം ചെയ്യലിന് ശേഷമാണ് ക്രൈംബ്രാഞ്ച് അറസ്റ്റ് രേഖപ്പെടുത്തിയത്.
സ്വർണക്കൊള്ളയുടെ മുഖ്യസൂത്രധാരനെന്ന് കരുതുന്ന ഉണ്ണികൃഷ്ണൻ പോറ്റി, മുൻ അഡ്മിനിസ്ട്രേറ്റീവ് ഓഫീസർ മുരാരി ബാബു, മുൻ എക്സിക്യൂട്ടീവ് ഓഫീസർ ഡി. സുധീഷ് കുമാർ എന്നിവർ നേരത്തെ അറസ്റ്റിലായിരുന്നു. ക്ഷേത്രത്തിലെ ദ്വാരപാലക വിഗ്രഹങ്ങളിലെ സ്വർണപ്പാളികൾ ചെമ്പാണെന്ന് ദേവസ്വം രേഖകളിൽ തെറ്റായി രേഖപ്പെടുത്താനും, അനുമതിയില്ലാതെ ഇത് പുറത്തേക്ക് കൊണ്ടുപോകാനും സഹായിച്ച ഉദ്യോഗസ്ഥ വീഴ്ചകളാണ് കേസിൽ അന്വേഷിക്കുന്നത്. അറസ്റ്റ് ചെയ്ത ബൈജുവിനെ തുടർനടപടികൾക്കായി കോടതിയിൽ ഹാജരാക്കും. മണ്ഡലകാലം ആരംഭിക്കാനിരിക്കെ കേസിൽ കൂടുതൽ ഉന്നത ഉദ്യോഗസ്ഥരിലേക്ക് അന്വേഷണം നീളുന്നത് ദേവസ്വം ബോർഡിന് വലിയ വെല്ലുവിളിയായിരിക്കുകയാണ്.