ഇടുക്കി: തമിഴ്നാട്ടിലെ ഭരണകക്ഷിയായ ഡിഎംകെ (DMK) ഇടുക്കി ജില്ലയിൽ തദ്ദേശ തിരഞ്ഞെടുപ്പിൽ ഒറ്റയ്ക്ക് മത്സരിക്കുമെന്ന് പ്രഖ്യാപിച്ചു. കേരളത്തിലെ പ്രധാന രാഷ്ട്രീയ മുന്നണികളായ യുഡിഎഫ്, എൽഡിഎഫ് എന്നിവരുമായി സഖ്യമില്ലാതെ മുഴുവൻ സീറ്റുകളിലും സ്ഥാനാർത്ഥികളെ നിർത്താനാണ് ഡിഎംകെ ജില്ലാ നേതൃത്വത്തിന്റെ തീരുമാനം. സംസ്ഥാനത്ത് തമിഴ് വോട്ടർമാർ നിർണായക സ്വാധീനം ചെലുത്തുന്ന ഇടുക്കിയിലെ അതിർത്തി പ്രദേശങ്ങളായ കമ്പംമെട്ട്, വണ്ടൻമേട്, ഉടുമ്പൻചോല, ചിന്നക്കനാൽ തുടങ്ങിയ പഞ്ചായത്തുകളിലാണ് പാർട്ടി പ്രധാനമായും ശ്രദ്ധ കേന്ദ്രീകരിക്കുന്നത്.

ജില്ലയിലെ തോട്ടം മേഖലകളിലെ തൊഴിലാളികൾക്കിടയിൽ ഡിഎംകെയ്ക്ക് കാര്യമായ സ്വാധീനമുണ്ട്. തമിഴ് ജനസംഖ്യ കൂടുതലുള്ള പ്രദേശങ്ങളിൽ വിജയം നേടാൻ കഴിയുമെന്നാണ് ഡിഎംകെ നേതാക്കൾ അവകാശപ്പെടുന്നത്. ഇടുക്കിയിൽ ഡിഎംകെ ഒറ്റയ്ക്ക് മത്സരിക്കുന്നത് ഇരു മുന്നണികളുടെയും വോട്ടുകൾ ഭിന്നിക്കാൻ സാധ്യതയുണ്ടെന്നും ഇത് തിരഞ്ഞെടുപ്പ് ഫലത്തെ സ്വാധീനിക്കുമെന്നും രാഷ്ട്രീയ നിരീക്ഷകർ വിലയിരുത്തുന്നു.