തിരുവനന്തപുരം: കേന്ദ്ര സർക്കാരിന്റെ 'പി എം ശ്രീ' (PM SHRI) പദ്ധതിയുടെ ധാരണാപത്രത്തിൽ ഒപ്പിട്ടതുമായി ബന്ധപ്പെട്ട് ഇടതുമുന്നണിയിലുണ്ടായ വിവാദത്തിൽ വീഴ്ച സമ്മതിച്ച് സി.പി.എം. സംസ്ഥാന സെക്രട്ടറി എം.വി. ഗോവിന്ദൻ. പദ്ധതി സംബന്ധിച്ച് മന്ത്രിസഭയിലും ഇടതുമുന്നണിയിലും ശരിയായ ചർച്ചകൾ നടന്നില്ല എന്നത് ഒരു വീഴ്ചയാണെന്ന് അദ്ദേഹം മാധ്യമങ്ങളോട് വ്യക്തമാക്കി. പി എം ശ്രീ പദ്ധതിയുടെ നിബന്ധനകളോടും വിദ്യാഭ്യാസ രംഗത്ത് ആർ.എസ്.എസ്. അജണ്ട നടപ്പാക്കാനുള്ള നീക്കത്തോടും സി.പി.എം. അന്നും ഇന്നും എതിരാണ്.

എന്നാൽ, കേന്ദ്രത്തിൽ നിന്ന് കേരളത്തിന് അർഹതപ്പെട്ട 8000 കോടി രൂപയോളം ലഭിക്കേണ്ടതുണ്ട്. വിഷയവുമായി ബന്ധപ്പെട്ട് സി.പി.ഐ. ഉൾപ്പെടെയുള്ള ഘടകകക്ഷികളുമായി ചർച്ചകൾ നടത്തി പ്രശ്നം പരിഹരിക്കും എന്നും എം.വി. ഗോവിന്ദൻ അറിയിച്ചു. ധാരണാപത്രം റദ്ദാക്കണമെന്ന് സി.പി.ഐ. ശക്തമായി ആവശ്യപ്പെട്ട സാഹചര്യത്തിലാണ് സി.പി.എം. സംസ്ഥാന സെക്രട്ടറിയുടെ ഈ തുറന്നുപറച്ചിൽ.