തിരുവനന്തപുരം: കേരളത്തിൽ അതിദാരിദ്ര്യം മാത്രമേ ഇല്ലാതായിട്ടുള്ളൂ എന്നും, ദാരിദ്ര്യം മാറിയിട്ടില്ല എന്നു മമ്മൂട്ടി. സാമൂഹ്യ ജീവിതം വികസിപ്പിക്കുക എന്നതാണ് മുഖ്യമന്ത്രിയുടെ മുന്നിലുള്ള വലിയ വെല്ലുവിളിയെന്നും മമ്മൂട്ടി പറഞ്ഞു. കേരളത്തെ അതിദാരിദ്ര്യമുക്തമായി പ്രഖ്യാപിക്കുന്ന ചടങ്ങിൽ സംസാരിക്കുകയായിരുന്നു മമ്മൂട്ടി.രാജപാതകളും കെട്ടിടങ്ങളും മാത്രമല്ല വികസനം. ദാരിദ്ര്യം പൂർണമായി തുടച്ചുമാറ്റിയെങ്കിൽ മാത്രമേ വികസനം സാധ്യമാകൂ. അതിദാരിദ്ര്യം നിർമാർജന പദ്ധതിയുടെ റിപ്പോർട്ട് മുഖ്യമന്ത്രി പിണറായി വിജയൻ നടൻ മമ്മൂട്ടിക്ക് കൈമാറിക്കൊണ്ട് പ്രകാശനം ചെയ്തു.

വിശക്കുന്ന വയറുകൾ കണ്ടുകൊണ്ടായിരിക്കണം വികസനം നടപ്പാക്കേണ്ടതെന്നും, സാഹോദര്യവും സാമൂഹിക ബോധവുമാണ് കേരളത്തിന്റെ നേട്ടങ്ങളുടെ അടിസ്ഥാനമെന്നും അദ്ദേഹം കൂട്ടിച്ചേർത്തു. എട്ടു മാസത്തിനുശേഷമാണ് താൻ ഒരു പൊതുവേദിയിൽ എത്തുന്നത്. മാസങ്ങൾക്ക് ശേഷം കേരളത്തിൽ എത്തിയപ്പോൾ കണ്ണഞ്ചിപ്പിക്കുന്ന വികസനമാണ് കണ്ടതെന്നും കേരളം തന്നെക്കാൾ ചെറുപ്പമാണെന്നും മമ്മൂട്ടി പറഞ്ഞു. അതേസമയം, കേരളം അതിദാരിദ്ര്യമുക്തമായി എന്ന് മുഖ്യമന്ത്രി പിണറായി വിജയൻ പ്രഖ്യാപിച്ചു. ഈ പ്രഖ്യാപനം തട്ടിപ്പല്ലെന്നും യഥാർത്ഥ പ്രഖ്യാപനമാണെന്നും അദ്ദേഹം അവകാശപ്പെട്ടു.