തിരുവനന്തപുരം: പി.എം.ശ്രീ പദ്ധതിയുമായി ബന്ധപ്പെട്ട് നടന്ന എഐഎസ്എഫ്-എഐവൈഎഫ് പ്രതിഷേധം അതിരുകടന്നുവെന്ന് വിദ്യാഭ്യാസമന്ത്രി വി. ശിവൻകുട്ടി. മന്ത്രി ജി.ആർ. അനിലിന്റെ പ്രസ്താവന തന്റെ മനസ്സിനെ വേദനിപ്പിച്ചു എന്നും അദ്ദേഹം പ്രതികരിച്ചു. ഇത് സിപിഎമ്മും സിപിഐയും തമ്മിലുള്ള പ്രശ്‌നമായിരുന്നുവെന്നും, അതിൽ പ്രതികരിക്കുമ്പോൾ വാക്കുകൾ ശ്രദ്ധിച്ചുപയോഗിക്കണം എന്നും അദ്ദേഹം പറഞ്ഞു. എഐഎസ്എഫ്, എഐവൈഎഫ് നേതാക്കളുടെ വാക്കുകളും വിഷമം ഉണ്ടാക്കി. തന്റെ കോലം കത്തിച്ചത് ശരിയായില്ലെന്നും മന്ത്രി വ്യക്തമാക്കി. ഒരിക്കലും ആർക്കും വേദനയുണ്ടാകുന്ന കാര്യങ്ങൾ ചെയ്യാൻ പാടില്ലായിരുന്നു.

പ്രയോഗിക്കുന്ന വാക്കുകൾ ശ്രദ്ധിച്ച് പ്രയോഗിക്കുന്നത് എല്ലാവർക്കും നല്ലതാണ്. വേദന തോന്നുന്ന രീതിയിലുള്ള പ്രതിഷേധം ഒരിക്കലും കമ്യൂണിസ്റ്റ് പാർട്ടികൾ തമ്മിൽ ഉണ്ടാകാൻ പാടില്ലെന്നും അദ്ദേഹം പറഞ്ഞു.ജി.ആർ. അനിലിന്റെ പ്രസ്താവനയും പ്രകാശ്ബാബു എം.എ. ബേബിയെക്കുറിച്ച് നടത്തിയ വിമർശനവും ഒട്ടും ശരിയായില്ലെന്നും അദ്ദേഹം പറഞ്ഞു. മുഖ്യമന്ത്രിയും സിപിഐ-സിപിഎം നേതാക്കളും ഉൾപ്പെടെയുള്ളവർ ചർച്ചചെയ്തുകൊണ്ടിരിക്കുന്നതിനിടെ കോലം കത്തിക്കുന്നത് ആവർത്തിക്കപ്പെടാൻ പാടില്ലായിരുന്നു എന്നും അദ്ദേഹം കൂട്ടിച്ചേർത്തു.