പി.എം.ശ്രീ പദ്ധതിയിൽ സംസ്ഥാന സർക്കാർ ധാരണാപത്രം ഒപ്പിട്ടതിനെ വിമർശിച്ച് സി.പി.ഐ.എം. കേന്ദ്ര കമ്മിറ്റി അംഗം എം.എ. ബേബി. ഇടത് മുന്നണിയിൽ ചർച്ച ചെയ്യുന്നതിന് മുൻപ് പി.എം.ശ്രീയിൽ ഒപ്പിട്ട സാഹചര്യം ഒഴിവാക്കേണ്ടതായിരുന്നു എന്നാണ് അദ്ദേഹത്തിന്റെ വിമർശനം. ധാരണാപത്രത്തിൽ ഒപ്പിടുന്നത് എല്ലാവർക്കും വ്യക്തത വരുന്ന രീതിയിലാകണമായിരുന്നു എന്നും, ഒപ്പിടുന്നതിന് മുൻപ് അതിൽ വ്യക്തത വരുത്തണമായിരുന്നുവെന്നും ഇതേ കാര്യം മുഖ്യമന്ത്രി പറഞ്ഞതാണല്ലോ എന്നും എം.എ. ബേബി ചോദിച്ചു. ഈ തീരുമാനത്തിന്റെ അടിസ്ഥാനത്തിലാണ് മന്ത്രിസഭാ ഉപസമിതി ഇപ്പോൾ രൂപീകരിച്ചതെന്നും, ഇനി ഉപസമിതിയുടെ പ്രവർത്തനങ്ങൾ എങ്ങനെ മുന്നോട്ടുപോകുന്നു എന്ന് വിലയിരുത്തുന്നതിനാണ് ഊന്നൽ നൽകേണ്ടതെന്നും അദ്ദേഹം കൂട്ടിച്ചേർത്തു.
എം.എ. ബേബിയും സി.പി.ഐ. സംസ്ഥാന സെക്രട്ടറി ബിനോയ് വിശ്വവും തമ്മിൽ നടത്തിയ കൂടിക്കാഴ്ചയാണ് ധാരണാപത്രം മരവിപ്പിക്കാനുള്ള സർക്കാർ തീരുമാനത്തിലേക്ക് വഴിവെച്ചത്. സി.പി.ഐ.യും സി.പി.ഐ.എമ്മും ചേർന്ന് എല്ലാവരും ആഗ്രഹിച്ച ഒരു തീരുമാനമെടുത്തുവെന്നും, സി.പി.ഐ. ജനറൽ സെക്രട്ടറി എ.കെ.ജി. ഭവനിൽ വന്ന് കാര്യങ്ങൾ സംസാരിച്ചിരുന്നുവെന്നും അദ്ദേഹം പറഞ്ഞു. പി.എം.ശ്രീ വിഷയത്തിൽ സി.പി.ഐ. എതിർപ്പറിയിച്ചതിനെക്കുറിച്ച് പോസ്റ്റ്‌മോർട്ടം നടത്താൻ മുതിരുന്നില്ലെന്നും അദ്ദേഹം വ്യക്തമാക്കി. വിഷയത്തിൽ സി.പി.ഐ.എം. കേന്ദ്ര കമ്മിറ്റി പരിശോധിക്കില്ല. മന്ത്രിസഭാ ഉപസമിതി വിഷയം പരിശോധിക്കുന്നുള്ളതിനാൽ മറ്റു പരിശോധനകൾ ആവശ്യമില്ലെന്നും അദ്ദേഹം കൂട്ടിച്ചേർത്തു.