ഇടുക്കി: തൊടുപുഴയ്ക്ക് സമീപം ചീനിക്കുഴിയിൽ മകനെയും മരുമകളെയും അവരുടെ രണ്ടു പെൺമക്കളെയും അർദ്ധരാത്രിയിൽ തീകൊളുത്തി കൊലപ്പെടുത്തിയ കേസിൽ പ്രതിക്ക് വധശിക്ഷ. ചീനിക്കുഴി ആലിയകുന്നേൽ സ്വദേശിയായ ഹമീദിനെയാണ് (82) തൊടുപുഴ മുട്ടം ഒന്നാം അഡീഷണൽ സെഷൻസ് കോടതി ജഡ്ജി ആഷ് കെ. ബാൽ ശിക്ഷിച്ചത്. 82 വയസ്സായെങ്കിലും പ്രതിയുടെ പ്രായം പരിഗണിക്കുന്നില്ലെന്നും വധശിക്ഷ വിധിക്കുകയാണെന്നും കോടതി വ്യക്തമാക്കി.

2022 മാര്‍ച്ച് 19-ന് ശനിയാഴ്ച പുലര്‍ച്ചെ 12.30-നാണ് സംഭവം നടന്നത്. ചീനിക്കുഴി ആലിയക്കുന്നേല്‍ മുഹമ്മദ് ഫൈസല്‍ (ഷിബു-45), ഭാര്യ ഷീബ (40), പെണ്‍മക്കളായ മെഹ്റിന്‍ (16), അസ്ന (13) എന്നിവരെയാണ് പ്രതി കിടപ്പുമുറിയില്‍ പൂട്ടിയിട്ട് തീയിട്ട് കൊന്നത്. കൊലക്കുറ്റത്തിന് വധശിക്ഷയും നാല് ലക്ഷം രൂപ പിഴയുമാണ് കോടതി വിധിച്ചത്. വീട് തീവെച്ചതിന് 10 വർഷം തടവും രണ്ട് ലക്ഷം രൂപ പിഴയും ശിക്ഷ വിധിച്ചിട്ടുണ്ട്. സ്വത്ത് തർക്കത്തെത്തുടർന്ന്, കരുതിക്കൂട്ടി കൊലപാതകം നടത്തിയ ഈ കൂട്ടക്കൊലക്കേസിൽ പ്രതി കുറ്റക്കാരനാണെന്ന് ചൊവ്വാഴ്ച കോടതി കണ്ടെത്തിയിരുന്നു.

അർദ്ധരാത്രിയിൽ മകൻ ഫൈസലും ഭാര്യയും മക്കളും ഉറങ്ങിയെന്ന് ഉറപ്പാക്കിയ ശേഷമാണ് പ്രതി ഹമീദ് അതിക്രമം നടത്തിയത്. അവരുടെ കിടപ്പുമുറിയുടെ വാതിൽ പുറത്തുനിന്ന് പൂട്ടിയശേഷം, രണ്ട് പെട്രോൾ കുപ്പികൾ തീകൊളുത്തി ജനൽവഴി മുറിക്കകത്തേക്ക് എറിയുകയായിരുന്നു. നിലവിളിയും പൊട്ടിത്തെറി ശബ്ദവും കേട്ട് അയൽവാസികൾ ഓടിയെത്തിയെങ്കിലും മുറിക്കുള്ളിലേക്ക് കടക്കാൻ സാധിച്ചില്ല. നാലുപേരും മുറിക്കുള്ളിൽ വെന്തുമരിച്ചു.

ആസൂത്രിതമായി നടത്തിയ കൊലപാതകമായിരുന്നെന്നും, നിസ്സഹായരായ നാലുപേരെയാണ് പ്രതി ജീവനോടെ കത്തിച്ചു കൊന്നതെന്നും പ്രോസിക്യൂഷൻ കോടതിയിൽ ചൂണ്ടിക്കാട്ടി. അതിനാൽ, ശിക്ഷയിൽ പ്രതിയുടെ പ്രായം പരിഗണിക്കരുതെന്നും പ്രോസിക്യൂഷൻ ആവശ്യപ്പെട്ടു. എന്നാൽ, പ്രായം പരിഗണിച്ച് കുറഞ്ഞ ശിക്ഷ നൽകണമെന്നായിരുന്നു പ്രതിഭാഗത്തിന്റെ വാദം.പ്രോസിക്യൂഷനുവേണ്ടി എം. സുനിൽ മഹേശ്വരൻപിള്ള ഹാജരായി. കേസിൽ 71 സാക്ഷികളെ പ്രോസിക്യൂഷനും മൂന്ന് സാക്ഷികളെ പ്രതിഭാഗവും വിസ്തരിച്ചു. 137 രേഖകൾ തെളിവായി രേഖപ്പെടുത്തി.