തിരുവനന്തപുരം: പി എം ശ്രീ വിഷയത്തിൽ സിപിഎം, സിപിഐ തമ്മിലുള്ള പുകച്ചിൽ വർദ്ധിക്കുന്നു. നാളത്തെ മന്ത്രിസഭാ യോഗത്തിൽ പങ്കെടുക്കേണ്ട എന്ന് ഉറപ്പിച്ച് സിപിഐ. അടിയന്തരസംസ്ഥാന സെക്രട്ടറിയേറ്റ് യോഗത്തിലാണ് തീരുമാനം. അതിനിടെ ഉപസമിതിയെ വെക്കാം എന്ന നിർദ്ദേശവുമായി വീണ്ടും സിപിഐഎം സിപിഐയെ സമീപിച്ചിരുന്നു. ജനറൽ സെക്രട്ടറി എംഎ ബേബിയാണ് നിർദ്ദേശം മുന്നോട്ടുവച്ചത്. എന്നാൽ ആ നിർദ്ദേശം തള്ളിക്കളയാനാണ് സിപിഐ സംസ്ഥാന സെക്രട്ടറിയേറ്റിന്റെ തീരുമാനം.

മന്ത്രിസഭാ യോഗത്തിൽ നിന്നും വിട്ടുനിൽക്കാനുള്ള തീരുമാനവുമായി മുന്നോട്ടു പോകുമെന്ന് സിപിഐ വ്യക്തമാക്കി. സബ് കമ്മിറ്റി വെക്കാനുള്ള തീരുമാനത്തിൽ ആത്മാർത്ഥതയുണ്ടെങ്കിൽ പിഎം ശ്രീ പദ്ധതിയിൽ നിന്ന് പിന്മാറുകയാണ് സിപിഐഎം വേണ്ടത് എന്നാണ് സിപിഐ ആവശ്യപ്പെടുന്നത്. പദ്ധതിയിൽ നിന്നും പിന്മാറിയിട്ട് മറ്റുകാര്യങ്ങളെ കുറിച്ച് ആലോചിക്കുന്നത് നല്ലതെന്നും സമവായ നീക്കം വരികയാണെങ്കിൽ ധാരണപത്രം മരവിപ്പിക്കണം എന്നും സിപിഐ വ്യക്തമാക്കി. ധാരണാപക്രം മരവിപ്പിക്കണമെന്ന് ആവശ്യപ്പെട്ട് കേന്ദ്രത്തിന് കത്തയക്കണമെന്നും ആ കത്ത് പ്രസിദ്ധപ്പെടുത്തണം എന്നുമാണ് സിപിഐയുടെ നിലപാട്.