തിരുവനന്തപുരം: ഫുട്‌ബോള്‍ താരം മെസി കേരളത്തിൽ വരുന്നതുമായി ബന്ധപ്പെട്ട ചോദ്യങ്ങൾക്ക് ഉത്തരം നൽകാതെ കായികമന്ത്രി വി അബ്ദുറഹിമാന്‍. കലൂര്‍ സ്റ്റേഡിയം നവീകരിച്ചതുമായി ബന്ധപ്പെട്ട വിവാദങ്ങൾക്കിടെയാണ് അതുമായി ബന്ധപ്പെട്ട കായിക വകുപ്പിന്റെ പ്രതികരണം തേടിയ മാധ്യമങ്ങളിൽ നിന്നും മന്ത്രി ഒഴിഞ്ഞു മാറിയത്. സ്റ്റേഡിയം നവീകരണത്തില്‍ കോണ്‍ഗ്രസും ബിജെപിയും അഴിമതി ആരോപിക്കുന്നതിനിടയിലാണ് മന്ത്രി ഇത്തരത്തിൽ മൗനം പാലിക്കുന്നത്. മന്ത്രിയോട് മാധ്യമങ്ങള്‍ ചോദ്യങ്ങള്‍ ആവര്‍ത്തിക്കുന്നതിനിടെ എസി മൊയ്തീന്‍ എംഎല്‍എയും പൊലീസ് ഉദ്യോഗസ്ഥരും മന്ത്രിക്ക് പ്രതിരോധം തീര്‍ക്കുകയും ചെയ്തു.
തൃശൂരിലെ എരുമപ്പെട്ടിയിൽ ഒരു ഗ്രൗണ്ട് ഉദ്ഘാടനം ചെയ്യാനെത്തിയതായിരുന്നു കായികമന്ത്രിയും സ്ഥലം എം.എൽ.എ. എ.സി. മൊയ്തീനും. മന്ത്രി മാധ്യമങ്ങളുടെ ചോദ്യങ്ങളോട് മുഖം തിരിക്കുകയും മൗനം പാലിക്കുകയും ചെയ്തപ്പോൾ, ചോദ്യങ്ങൾ തുടർന്ന റിപ്പോർട്ടർമാരോട് എ.സി. മൊയ്തീൻ അസഹിഷ്ണുതയോടെ പ്രതികരിച്ചു. അദ്ദേഹം "ഇപ്പോൾ ചോദിക്കാൻ പറ്റില്ല" എന്ന് പറഞ്ഞ് ക്യാമറ തടയുകയും മൈക്ക് തള്ളുകയും ചെയ്തു. .