ചെന്നൈ: കരൂരിലെ ദുരന്തത്തില്‍ മരിച്ചവരുടെ കുടുംബാംഗങ്ങളുമായും പരുക്കേറ്റവരുമായും തമിഴ്ക വെട്രിക് കഴകം അധ്യക്ഷനും നടനുമായ വിജയ് കൂടിക്കാഴ്ച നടത്തി. മഹാബലിപുരത്തെ സ്വകാര്യ ഹോട്ടലിൽ വെച്ചാണ് കൂടിക്കാഴ്ച്ച പുരോഗമിക്കുന്നത്. കരൂര്‍ ദുരന്തമുണ്ടായി ഒരു മാസം ആകുമ്പോഴാണ് വിജയ് ദുരന്തത്തിൽ പെട്ടവരെ നേരിൽ കാണുന്നത്. കരൂരില്‍ നിന്ന് പ്രത്യേക ബസ്സുകളിലായി ഇന്നലെ രാത്രിയോട കുടുംബങ്ങളെ മഹാബലിപുരത്തേ ഹോട്ടലില്‍ എത്തിച്ചിരുന്നു. അന്‍പതിലധികം മുറികളിലായാണ് കുടുംബങ്ങൾ താമസിക്കുന്നത്. അവരുടെ റൂമുകളിൽ എത്തിയാണ് വിജയ് കൂടിക്കാഴ്ച്ച നടത്തുന്നത്.
ഓരോരുത്തരുടേയും ആവശ്യങ്ങള്‍ വിജയ് പ്രത്യേകം ചോദിച്ചറിഞ്ഞ് നടത്തിക്കൊടുക്കുമെന്നാണ് ടിവികെ പറയുന്നത്. അതേസമയം ദുരന്തം നടന്ന കരൂരിലേക്ക് എത്താതെ ദുരന്തബാധിതരെ ചെന്നൈയിലേക്ക് എത്തിച്ചതില്‍ ഡിഎംകെയുടെ നേതാക്കളടക്കം വലിയ വിമര്‍ശനമാണ് ഉന്നയിക്കുന്നത്. അപകടത്തില്‍ അന്വേഷണം ആരംഭിച്ച സിബിഐ ടിവികെ ജനറല്‍ സെക്രട്ടറി എന്‍ ആനന്ദ്, ജോയിന്റ് ജനറല്‍ സെക്രട്ടറി സി ടി നിര്‍മല്‍കുമാര്‍ എന്നിവര്‍ക്ക് സമന്‍സ് അയച്ചു. നാളെ ഇരുവരും സിബിഐ സംഘത്തിന് മുന്നില്‍ ഹാജരാകണം.