കൊച്ചി: സംവിധായകൻ രഞ്ജിത്തിനെതിരായ ലൈംഗികാതിക്രമക്കേസ് ഹൈക്കോടതി റദ്ദാക്കി. ബംഗാളി നടയുടെ പരാതിയിൽ എടുത്ത കേസ് ആണ് കോടതി റദ്ദാക്കിയത്. കേസെടുക്കുവാനുള്ള കാലപരിധി അവസാനിച്ചുവെന്ന് ചൂണ്ടിക്കാട്ടിയാണ് കോടതിയുടെ നടപടി. രഞ്ജിത്തിനെതിരായ കേസ് നിലനിൽക്കില്ലെന്ന് കോടതി വ്യക്തമാക്കി. പാലേരി മാണിക്യം ചിത്രത്തിന്റെ ഷൂട്ടിംഗ് സമയത്ത് രഞ്ജിത്ത് മോശമായി പെരുമാറി എന്നായിരുന്നു നടി പരാതി നൽകിയിരുന്നത്. നടിയുടെ പരാതിയിൽ എടുത്ത കേസ് റദ്ദാക്കണമെന്ന് ആവശ്യപ്പെട്ട് രഞ്ജിത്ത് ഹൈക്കോടതിയെ സമീപിച്ചിരുന്നു.

തനിക്കെതിരായി പരാതിയിൽ പറയുന്ന ആരോപണങ്ങൾ നിലനിൽക്കില്ലെന്നും. 2009ൽ നടന്ന സംഭവത്തിന് നടി 2024 ഓഗസ്റ്റ് 26നാണ് പരാതി നൽകിയത് എന്നും രഞ്ജിത്ത് ഹർജിയിൽ ചൂണ്ടിക്കാട്ടി. ഹോട്ടൽ മുറിയിൽ വച്ച് സംവിധായകൻ രഞ്ജിത്ത് പീഡിപ്പിച്ചു എന്നായിരുന്നു ബംഗാളി നടിയുടെ പരാതി. നടിയുടെ പരാതിക്ക് പിന്നാലെ താൻ ഇരയാണ് എന്നായിരുന്നു രഞ്ജിത്തിന്റെ പ്രതികരണം. ഇതിനെ തുടർന്ന് നടി നിയമപരമായി മുന്നോട്ടുപോവുകയായിരുന്നു.