തിരുവനന്തപുരം: സിപിഐക്കെതിരെ ഒളിയമ്പുമായി മുഖ്യമന്ത്രി പിണറായി വിജയൻ. പദ്ധതികൾ നടപ്പാക്കുന്നതിനാണ് സർക്കാർ എന്നും മുടക്കുന്നവരുടെ കൂടെയല്ലെന്നും വിമർശിച്ചു. പുന്നപ്ര വയലാർ വാരാചാരണ സമാപനത്തിലാണ് വിമർശനം ഉന്നയിച്ചത്. സിപിഐ സംസ്ഥാന സെക്രട്ടറി ബിനോയ് വിശ്വം പങ്കെടുത്ത ചടങ്ങിലാണ് മുഖ്യമന്ത്രിയുടെ പരാമർശം.

രാജ്യത്തിന് അഭിമാനിക്കാൻ വക നൽകുന്ന സംസ്ഥാനമാണ് കേരളം. ഇവിടെ വന്നപ്പോൾ രാഷ്ട്രപതിയും പ്രകീർത്തിച്ചു. ഭ്രാന്താലയം മനുഷ്യാലയം ആയതിന്റെ ചരിത്രം മറന്നു പോകരുതെന്നും ആധുനിക കേരളത്തിന് അടിത്തറ ഇട്ടത് ഇഎംഎസ് സർക്കാർ ആണെന്ന് മുഖ്യമന്ത്രി പറഞ്ഞു. വികസനത്തിന്റെ പ്രത്യേകത ഘട്ടത്തിൽ കേരളം നിൽക്കുന്നുവെന്ന് മുഖ്യമന്ത്രി. പല കാര്യത്തിലും സംസ്ഥാനം മുൻപിൽ ആണ്. 10 വർഷം മുമ്പത്തെ സ്ഥിതിയല്ല ഇപ്പോൾ.

2006 മുതൽ 2011 വരെ എൽഡിഎഫ് സർക്കാർ കേരളം ഭരിച്ചു. എന്നാൽ 2011 മുതൽ 2016 വരെ അധികാരത്തിൽ വന്ന യുഡിഎഫ് സർക്കാർ 2006-ലെ എൽഡിഎഫ് സർക്കാർ കൊണ്ടുവന്ന നേട്ടങ്ങളെ പിന്നോട്ടടിച്ചു. ഈ കാലയളവിൽ പാഠപുസ്തകങ്ങൾ ഫോട്ടോ സ്റ്റാറ്റ് എടുത്ത് നൽകേണ്ട സ്ഥിതിയുണ്ടാവുകയും, ആയിരത്തോളം സ്കൂളുകൾ പൂട്ടുകയും ചെയ്തു. എന്നാൽ 2016-ൽ എൽഡിഎഫ് വീണ്ടും അധികാരത്തിൽ വന്നതോടെ പൊതുവിദ്യാഭ്യാസ രംഗം മെച്ചപ്പെട്ടുവെന്നും കേന്ദ്രസർക്കാർ പോലും ഇത് സാക്ഷ്യപ്പെടുത്തിയെന്നും മുഖ്യമന്ത്രി വ്യക്തമാക്കി.