തിരുവനന്തപുരം: പി എം ശ്രീ പദ്ധതി കേരളത്തിന് ആവശ്യം ഇല്ലെന്നും ഏത് നിമിഷവും പിന്മാറാമെന്നും വിദ്യാഭ്യാസ മന്ത്രി വി ശിവൻകുട്ടി. പി എം ശ്രീ ധാരണപത്രത്തിൽ നിന്നും കേരളത്തിന് ഏത് നിമിഷവും റദ്ദാക്കാമെന്നും അദ്ദേഹം പറഞ്ഞു. കേരളത്തിലെ വിദ്യാഭ്യാസ നയം ആർഎസ്എസിനു മുന്നിൽ അടിയറവ് വെക്കില്ലെന്നും അത് കെ സുരേന്ദ്രന്റെ സ്വപ്നം ആണെന്നും മന്ത്രി മുൻ ബിജെപി അധ്യക്ഷന് മറുപടി നൽകി.

പിന്മാറണമെങ്കിൽ ഇരുപക്ഷവും തമ്മിൽ ആലോചിച്ചിട്ട് ആണ് പിന്മാറേണ്ടത്. രണ്ട് കക്ഷികൾക്കും അങ്ങനെയൊരു അവകാശം ഉണ്ടെന്നും വിദ്യാഭ്യാസമന്ത്രി വ്യക്തമാക്കി. 47 ലക്ഷത്തോളം വരുന്ന വിദ്യാർഥികളെ ബാധിക്കുന്ന വിഷയമാണ്. അതിനാൽ തന്നെ ഫണ്ട് വാങ്ങാതിരിക്കാൻ സാധിക്കില്ല. എൻ ഇ പി യിൽ പറയുന്ന എട്ടുകാര്യങ്ങളാണ് കേരളത്തിൽ നടപ്പിലാക്കിയിട്ടുള്ളത്.

കേരളത്തിന് പി എം ശ്രീ പദ്ധതിയുടെ ആവശ്യമില്ല. എസ് എസ് കെയുടെ ഫണ്ട് മാത്രം മതി.അത് നഷ്ടപ്പെടുത്തുന്നത് എന്തിനാണെന്നും അദ്ദേഹം ചോദിച്ചു. ഈ വിഷയത്തിൽ നിയമപദേശം തേടിയതാണ്. അതിന്റെ കൂടുതൽ വിശദാംശങ്ങളിലേക്ക് പോകേണ്ടതില്ലെന്നും എംഒയു ഒപ്പിട്ടാൽ തന്നെ ബാക്കി ഫണ്ട് കിട്ടുമെന്നും മന്ത്രി പറഞ്ഞു. മാത്രമല്ല കേരളത്തിൽ 1 മുതൽ 10 വരെയുള്ള പാഠപുസ്തകങ്ങൾ ഇതിനോടകം തന്നെ പ്രിന്റ് ചെയ്തു കഴിഞ്ഞുവെന്നും മന്ത്രി വി ശിവൻകുട്ടി.