തിരുവനന്തപുരം: കേരളത്തിന് ദോഷകരമാണെങ്കിൽ പിഎം ശ്രീ പദ്ധതി നടപ്പിലാക്കാൻ അനുവദിക്കില്ലെന്ന് എൽഡിഎഫ് കൺവീനർ ടി.പി രാമകൃഷ്ണൻ വ്യക്തമാക്കി. ഇടതുപക്ഷ ജനാധിപത്യ മുന്നണിയിൽ തർക്കങ്ങൾ നിലനിൽക്കുന്നില്ലെന്നും പിഎം ശ്രീ പദ്ധതിയുമായി ബന്ധപ്പെട്ട് സിപിഐയിൽ അഭിപ്രായവ്യത്യാസം ഉണ്ടായിട്ടുണ്ട്. എന്നാൽ അത് എൽഡിഎഫിലെ ഭിന്നതയായി കണക്കാക്കേണ്ട സാഹചര്യം ഇല്ലെന്നും ടിപി രാമകൃഷ്ണൻ പറഞ്ഞു. നിലനിൽക്കുന്ന വിഷയത്തിൽ ചർച്ച നടത്തി ന്യായമായ നിലപാട് സ്വീകരിക്കുമെന്നും അദ്ദേഹം വ്യക്തമാക്കി. ഇതിനിടയിൽ സിപിഐയെ അനുനയിപ്പിക്കാൻ ശ്രമവുമായി മന്ത്രി വി ശിവൻകുട്ടി. സിപിഐ സംസ്ഥാന സെക്രട്ടറി ബിനോയ് വിശ്വവുമായും മന്ത്രി ജി ആർ അനിലുമായും ചർച്ച നടത്തി.

എന്നാൽ ചർച്ചയിൽ വലിയ പുരോഗതി ഉണ്ടായില്ല എന്നാണ് സൂചന. പിഎം ശ്രീയിൽ നിന്നും സർക്കാർ പിന്മാറണമെന്ന് ആവശ്യത്തിൽ ഉറച്ചു നിൽക്കുകയാണ് സിപിഐ. സി.പി.ഐ.യുടെ യുവജനവിഭാഗമായ എ.ഐ.വൈ.എഫും ശക്തമായ പ്രതിഷേധമാണ് നടത്തിയത്. പ്രവർത്തകർ കണ്ണൂരിൽ മന്ത്രിയുടെ കോലം കത്തിച്ചു. കേന്ദ്രസർക്കാരിന്റെ വർഗീയ അജണ്ടകൾക്ക് കൂട്ടുനിന്നെന്നും, മതേതര നിലപാടുകളെ ഒറ്റിക്കൊടുത്തുവെന്നും ആരോപിച്ചുകൊണ്ടാണ് പ്രതിഷേധം. പിഎം ശ്രീ പദ്ധതിയുമായി ബന്ധപ്പെട്ട് എസ് എഫ്ഐയും എൽഡിഎഫിന് എതിരാണ്. വിളിച്ച മുദ്രാവാക്യങ്ങളെ ഒറ്റുകൊടുക്കുന്നത് തിരുത്തപ്പെടണമെന്നും കീഴടങ്ങൽ മരണവും ചെറുത്തുനിൽപ്പ് പോരാട്ടവും ആണെന്ന് എസ്എഫ്ഐ പ്രതികരിച്ചു.