കൊല്ലം: പുനലൂർ താലൂക്ക് ആശുപത്രിയിൽ മൃതദേഹത്തിലെ സ്വർണാഭരണങ്ങൾ മോഷണം പോയതായി പരാതി. ഭർത്താവ് വെട്ടിക്കൊലപ്പെടുത്തിയ കലയനാട് സ്വദേശി ശാലിനിയുടെ സ്വർണമാണ് കാണാതായത്. 20 ഗ്രാം സ്വർണമാണ് മോഷ്ടിക്കപ്പെട്ടത്. കഴിഞ്ഞമാസം 22നാണ് ഭർത്താവ് ഐസക്ക് വെട്ടിപ്പരിക്കേൽപ്പിച്ച ശാലിനിയെ പുനലൂർ താലൂക്ക് ആശുപത്രിയിൽ തീവ്രപരിചരണ വിഭാഗത്തിൽ പ്രവേശിപ്പിച്ചത്.

മരണം സ്ഥിരീകരിച്ചതോടെ മൃതദേഹം മോർച്ചറിയിലേക്ക് മാറ്റാനുള്ള നടപടികൾ ആരംഭിച്ചു. ഇതിനിടെ ജീവനക്കാരി സ്വർണാഭരണങ്ങൾ അഴിച്ചുമാറ്റി എന്നാണ് ആരോപണം. ബന്ധുക്കൾക്കോ പോലീസിനോ കൈമാറാതെ ഇഞ്ചക്ഷൻ റൂമിലെ അലമാരയിൽ സൂക്ഷിക്കുകയായിരുന്നു. ബന്ധുക്കൾ സ്വർണം അന്വേഷിച്ച് എത്തിയപ്പോഴാണ് മോഷണ വിവരം പുറത്തെത്തിയത്. ഇതോടെ ആശുപത്രി അധികൃതർ പുനലൂർ പോലീസിന് പരാതി നൽകുകയായിരുന്നു.

ഈ മാസം 18-ന് പോലീസ് എഫ്ഐആർ രജിസ്റ്റർ ചെയ്ത് അന്വേഷണം ആരംഭിച്ചു. ആശുപത്രിയിലെ സിസിടിവി ദൃശ്യങ്ങൾ കേന്ദ്രീകരിച്ചാണ് പ്രധാനമായും അന്വേഷണം നടക്കുന്നത്. സംഭവസമയത്ത് ഡ്യൂട്ടിയിലുണ്ടായിരുന്ന ജീവനക്കാരെ ഉൾപ്പെടെ പോലീസ് ചോദ്യം ചെയ്തുവരുന്നു. മൃതദേഹത്തിൽ ഉണ്ടായിരുന്ന സ്വർണാഭരണങ്ങൾ ആശുപത്രി സൂപ്രണ്ടിനെ ഏൽപ്പിക്കുകയും, സൂപ്രണ്ട് അത് ലേ സെക്രട്ടറിക്കു കൈമാറി ആശുപത്രി ലോക്കറിൽ സൂക്ഷിക്കുകയും ചെയ്യണമെന്നാണ് നിലവിലെ ചട്ടം.