പി.എം. ശ്രീ പദ്ധതിയിൽ സംസ്ഥാനം ഒപ്പുവച്ചതുമായി ബന്ധപ്പെട്ട വിവാദങ്ങൾക്കിടെ വിദ്യാഭ്യാസ മന്ത്രി വി. ശിവൻകുട്ടി നടത്തിയ വാർത്താ സമ്മേളനത്തിന് പിന്നാലെ പരിഹാസവുമായി പാലക്കാട് എം.എൽ.എ. രാഹുൽ മാങ്കൂട്ടത്തിൽ. തൻ്റെ ഫേസ്ബുക്ക് പോസ്റ്റിലൂടെയാണ് രാഹുൽ മാങ്കൂട്ടത്തിൽ എംഎൽഎ മന്ത്രിയെ വിമർശിച്ചത്.
"പത്ര സമ്മേളനം കണ്ടപ്പോൾ ഒരു കാര്യം മനസിലായി, അയാൾ ശിവൻ കുട്ടിയല്ല ലക്ഷണമൊത്ത സംഘിക്കുട്ടിയാണ്" എന്നായിരുന്നു രാഹുലിന്റെ പ്രധാന വിമർശനം. കൂടാതെ, നേമത്ത് ബി.ജെ.പി. എം.എൽ.എ. തോറ്റെന്ന് ആരാണ് പറഞ്ഞതെന്ന് ചോദിച്ചുകൊണ്ട്, വിദ്യാഭ്യാസ മന്ത്രി വി. ശിവൻകുട്ടിയെ 'ശ്രീ. പി.എം. എം.എൽ.എ. സംഘിക്കുട്ടി' എന്നും അദ്ദേഹം പരിഹസിച്ചു.
അതേസമയം പി.എം. ശ്രീ പദ്ധതിയുടെ ധാരണാപത്രത്തിൽ ഒപ്പിട്ട സംസ്ഥാന വിദ്യാഭ്യാസ മന്ത്രി വി. ശിവൻകുട്ടിക്കെതിരെ സി.പി.ഐ.യുടെ യുവജനവിഭാഗമായ എ.ഐ.വൈ.എഫ്. ശക്തമായ പ്രതിഷേധം രേഖപ്പെടുത്തി. കേന്ദ്രസർക്കാരിന്റെ വർഗീയ അജണ്ടകൾക്ക് കൂട്ടുനിന്നെന്നും, മതേതര നിലപാടുകളെ ഒറ്റിക്കൊടുത്തുവെന്നും ആരോപിച്ചുകൊണ്ട് പ്രവർത്തകർ കണ്ണൂരിൽ മന്ത്രിയുടെ കോലം കത്തിച്ചു.