കണ്ണൂർ: പി.എം. ശ്രീ പദ്ധതിയുടെ ധാരണാപത്രത്തിൽ ഒപ്പിട്ട സംസ്ഥാന വിദ്യാഭ്യാസ മന്ത്രി വി. ശിവൻകുട്ടിക്കെതിരെ സി.പി.ഐ.യുടെ യുവജനവിഭാഗമായ എ.ഐ.വൈ.എഫ്. ശക്തമായ പ്രതിഷേധം രേഖപ്പെടുത്തി. കേന്ദ്രസർക്കാരിന്റെ വർഗീയ അജണ്ടകൾക്ക് കൂട്ടുനിന്നെന്നും, മതേതര നിലപാടുകളെ ഒറ്റിക്കൊടുത്തുവെന്നും ആരോപിച്ചുകൊണ്ട് പ്രവർത്തകർ കണ്ണൂരിൽ മന്ത്രിയുടെ കോലം കത്തിച്ചു.

മുന്നണി മര്യാദകൾ ലംഘിച്ചാണ് പദ്ധതിയിൽ ഒപ്പിട്ടതെന്ന സി.പി.ഐ. സംസ്ഥാന സെക്രട്ടറി ബിനോയ് വിശ്വത്തിൻ്റെ വിമർശനത്തിന് പിന്നാലെയാണ് എ.ഐ.വൈ.എഫ്. പ്രതിഷേധവുമായി രംഗത്തെത്തിയത്. ഈ വിഷയത്തിൽ എൽ.ഡി.എഫിലോ മന്ത്രിമാർക്കിടയിലോ ചർച്ച നടന്നിട്ടില്ലെന്നും, ഘടകകക്ഷികളെ ഇരുട്ടിലാക്കിയാണ് തീരുമാനമെടുത്തതെന്നും സി.പി.ഐ. വിമർശിക്കുന്നു.

അതേസമയം എം ശ്രീ പദ്ധതിയിൽ ഒപ്പിട്ട എൽഡിഎഫ് സർക്കാരിനെതിരെ വിമർശനവുമായി എസ്എഫ്ഐ. വിളിച്ച മുദ്രാവാക്യങ്ങളെ ഒറ്റുകൊടുക്കുന്നത് തിരുത്തപ്പെടണമെന്നും കീഴടങ്ങൽ മരണവും ചെറുത്തുനിൽപ്പ് പോരാട്ടവും ആണെന്ന് എസ്എഫ്ഐ കണ്ണൂർ ജില്ലാ സെക്രട്ടറി ശരത് രവീന്ദ്രൻ ഫേസ്ബുക്കിൽ കുറിച്ചു.