ഇടുക്കി: പരസ്പരം പരിഹാസവുമായി മന്ത്രി വി ശിവൻകുട്ടിയും കേന്ദ്രമന്ത്രി സുരേഷ് ഗോപിയും. ഒരു മൊട്ടുസൂചിയുടെ ഉപകാരം പോലും ഇല്ല കലുങ്ക് തമ്പുരാനിൽ നിന്ന് കേരളത്തിന്. കലുങ്കിസമാണ് പുള്ളിയുടെ പ്രത്യയശാസ്ത്രം എന്നാണ് സുരേഷ് ഗോപിയുടെ പരിഹാസത്തിന് വിദ്യാഭ്യാസ മന്ത്രി വി ശിവൻകുട്ടിയുടെ മറുപടി. ഇടുക്കിയിലെ വട്ടവടയിൽ നടന്ന ഒരു കലുങ്ക് സംവാദ പരിപാടിയിൽ വച്ച് സുരേഷ് ഗോപി നടത്തിയ പരിഹാസമാണ് ഈ പ്രതികരണത്തിന് പിന്നിൽ. വട്ടവടയിലെ നാട്ടുകാർ കലുങ്ക് സംവാദത്തിൽ വന്നപ്പോൾ സുരേഷ് ഗോപിയോട് നാട്ടിൽ ഒരു ഇംഗ്ലീഷ് മീഡിയം സ്കൂൾ വേണമെന്ന് ആവശ്യം ഉന്നയിച്ചിരുന്നു.

അതിന് മന്ത്രി വി ശിവൻകുട്ടിയെ പരിഹസിച്ചുകൊണ്ട് നല്ല വിദ്യാഭ്യാസമുള്ള ഒരു വിദ്യാഭ്യാസ മന്ത്രി വരട്ടെ എന്നായിരുന്നു സുരേഷ് ഗോപി മറുപടി പറഞ്ഞത്. തന്നെ എപ്പോഴും കളിയാക്കുന്ന ഒരു മന്ത്രിയാണ് ഇപ്പോൾ കേരളത്തിലുള്ളത് അവരൊക്കെ തെറിച്ചു മാറട്ടെ. എന്നിട്ട് നല്ല വിദ്യാഭ്യാസ മന്ത്രി വന്നാൽ തീർച്ചയായും ഇതിനെക്കുറിച്ച് ആലോചിക്കാം എന്നായിരുന്നു സുരേഷ് ഗോപി പ്രതികരിച്ചത്. സുരേഷ് ഗോപിയുടെ ഈ പരാമർശത്തിനെതിരെയാണ് പരിഹാസവുമായി വി ശിവൻകുട്ടി രംഗത്തെത്തിയിരിക്കുന്നത്. പാർലമെന്റ് അംഗമെന്ന നിലയിൽ സുരേഷ് ഗോപിയുടെ പ്രവർത്തനങ്ങൾ കലുങ്ക് നിർമ്മാണത്തിൽ ഒതുങ്ങിപ്പോയി എന്ന മുൻ വിമർശനം മന്ത്രി ഈ പ്രസ്താവനയിലൂടെ വീണ്ടും ഓർമിപ്പിച്ചു.