തിരുവനന്തപുരം: പാലക്കാട് ജില്ലയിലെ ബ്രൂവറി സർക്കാരിന്റെ വ്യാമോഹം മാത്രമാണെന്ന് കെസിബിസി മദ്യവിരുദ്ധ സമിതി. കേരളത്തിലേക്ക് ടൂറിസ്റ്റുകൾ വരുന്നത് ഇവിടുത്തെ മദ്യം കുടിക്കാൻ അല്ല. പ്രകൃതി സൗന്ദര്യവും ആചാരാനുഷ്ഠാനങ്ങളും ആസ്വദിക്കുവാനും പഠിക്കുവാനും ആണ്. മദ്യത്തിന്റെ ഉൽപ്പാദനം വർദ്ധിപ്പിക്കാനുള്ള മന്ത്രി എം ബി രാജേഷിന്റെ തീരുമാനം ധാർഷ്ട്യം നിറഞ്ഞതും അപക്വവും ആണെന്നും കെസിബിസി കുറ്റപ്പെടുത്തി. മദ്യത്തിന്റെയും മാരകലഹരി വസ്തുക്കളുടെയും ഹബ്ബായി മാറിയിരിക്കുകയാണ് കേരളം. മദ്യ ഉത്പാദനം വർദ്ധിപ്പിക്കുന്നതിന് മുമ്പ് ദുരന്തവും ദുരിതവും അനുഭവിക്കുന്നവരുടെ അഭിപ്രായ സ്വരൂപണം കൂടി നടത്തണമെന്നും കെസിബിസി പറഞ്ഞു.

മദ്യനയത്തിൽ ഒരു ഘട്ടത്തിൽ പോലും പൊതുജനങ്ങളോട് കൂറുപുലർത്താത്ത സർക്കാരാണ് ഇടതുപക്ഷത്തിന്റേത്. ആസന്നമായ തിരഞ്ഞെടുപ്പുകളെ ഭയമില്ല ഈ സർക്കാരിന്. തിരഞ്ഞെടുപ്പിന് മുമ്പ് മദ്യനിരോധനം പറയുകയും കഴിഞ്ഞാൽ വർജനം പറയുകയും ചെയ്യുന്ന കടകവിരുദ്ധമായ സമീപനമാണ് ഇടതു സർക്കാറിന് എന്നും കെ സി ബി സി. മദ്യനയം സംബന്ധിച്ച പ്രകടനപത്രിക ഇടതുമുന്നണി ഇനി പ്രസിദ്ധീകരിക്കരുതെന്നും മുൻ തിരഞ്ഞെടുപ്പുകളിൽ നൽകിയതൊക്കെ വ്യാജമായിരുന്നെന്ന് മന്ത്രി എംബി രാജേഷ് പുതിയ നയങ്ങളിലൂടെ വിളിച്ചു പറയുകയാണെന്നും കെസിബിസി ആരോപിച്ചു.