പത്തനംതിട്ട: രാഷ്ട്രപതിയുടെ ശബരിമല സന്ദർശനത്തിനായി വലിയ സുരക്ഷാക്രമീകരണങ്ങളാണ് ഒരുക്കിയിരിക്കുന്നത്. 1500 പോലീസുകാരെയാണ് സുരക്ഷ ഡ്യൂട്ടിക്കായി സന്നിധാനത്തെ വിന്യസിക്കുക. 50 വയസ്സ് കഴിഞ്ഞ വനിതാ പോലീസുകാരെയും സന്നിധാനത്ത് സുരക്ഷയ്ക്കായി നിയോഗിച്ചിട്ടുണ്ട്. രാഷ്ട്രപതി സന്നിധാനത്ത് എത്തുമ്പോൾ പതിനെട്ടാം പടിക്ക് മേലെ തിരുമറ്റത്ത് 10 പേരെ മാത്രമേ അനുവദിക്കുകയുള്ളൂ. ഇതിൽ തന്ത്രി, മേൽശാന്തി, രണ്ട് പരികർമ്മികൾ ദേവസ്വം ബോർഡ് ഭാരവാഹികൾ മൂന്ന് ജീവനക്കാർ എന്നിങ്ങനെ മാത്രമാണ് ഉണ്ടാവുക. 12:20 മുതൽ ഒരു മണി വരെയാണ് അയ്യപ്പനെ വണങ്ങാൻ രാഷ്ട്രപതി സോപാനത്ത് ഉണ്ടാവുക. 9:35ന് ഹെലികോപ്റ്ററിൽ തിരുവനന്തപുരത്ത് നിന്നും പുറപ്പെടുന്ന രാഷ്ട്രപതി 10:20 ന് ആണ് നിലക്കലെ ഹെലിപാഡിൽ എത്തുക.

അവിടെനിന്നും കാറിൽ 11 മണിക്ക് പമ്പയിൽ എത്തും. ഗണപതി ക്ഷേത്രത്തിൽ നിന്നും കെട്ടുനിറച്ച് സന്നിധാനത്തിലേക്ക് പുറപ്പെടും. സ്വാമി അയ്യപ്പൻ റോഡിലൂടെ ഫോർവീൽ ഡ്രൈവ് ഗൂർഖാ വാഹനത്തിൽ ആയിരിക്കും യാത്ര. ഒരേ പോലെയുള്ള ആറ് ​ഗൂർഖ വണ്ടികളിൽ ഒന്നിൽ ആയിരിക്കും രാഷ്ട്രപതി ഉണ്ടാവുക. ദർശനത്തിനുശേഷം 1:10ന് പ്രധാന ഓഫീസ് കോംപ്ലക്സ് സ്ഥിതി ചെയ്യുന്ന കെട്ടിടത്തിൽ പ്രത്യേകം ഒരുക്കിയ മുറിയിൽ ആയിരിക്കും രാഷ്ട്രപതി വിശ്രമിക്കുക. ശബരിമല വനത്തിലേക്ക് പ്രവേശിക്കുന്ന എല്ലാ വഴികളിലും പോലീസിനെ നിയോഗിക്കുന്നുണ്ട്. ചൊവ്വാഴ്ച 12098 പേർക്ക് മാത്രമാണ് സന്നിധാനത്ത് ദർശനം അനുവദിച്ചിരിക്കുന്നത്.