മലപ്പുറം: അന്ധനായി അഭിനയിച്ച് ഭിക്ഷാടനം നടത്തിയയാൾ പിടിയിൽ. മലപ്പുറം വളാഞ്ചേരിയിൽ ആണ് സംഭവം. കോട്ടയം സ്വദേശിയായ ഹംസയാണ് പിടിയിലായത്. ആളൊഴിഞ്ഞ സ്ഥലത്തിരുന്ന് പണം എണ്ണി നോക്കുന്നത് കണ്ടെത്തിയതോടെയാണ് കള്ളത്തരം പൊളിഞ്ഞത്. കറുത്ത കണ്ണട വെച്ച് അന്ധനാണെന്ന് ഭാവിച്ച് ഇയാൾ പല സ്ഥലങ്ങളിൽ നിന്നും ഭിക്ഷ നടത്തിയിരുന്നു.രണ്ടുമാസം മുമ്പാണ് ഹംസ വളാഞ്ചേരിയിൽ എത്തിയത്. അന്ധതയെ വിശ്വസിച്ച് നിരവധിപേർ പണം നൽകി ഇയാളെ സഹായിക്കുകയും ചെയ്തു.

അതിനിടെ കണ്ണ് കാണാത്തവർക്കായുള്ള പുനരധിനിവാസ കേന്ദ്രത്തിലേക്ക് മാറ്റാമെന്ന് നാട്ടുകാരിൽ ചിലർ പറഞ്ഞപ്പോൾ അയാൾ അത് നിരസിച്ചു. ഇതോടെയാണ് നാട്ടുകാർക്ക് സംശയം തോന്നിത്തുടങ്ങിയത്. ഇന്ന് പുലർച്ചെ ആളൊഴിഞ്ഞ ഒരു സ്ഥലത്തേക്ക് ഹംസ പോകുന്നത് നാട്ടുകാർ ശ്രദ്ധിച്ചു. തുടർന്ന് പിന്തുടർന്ന് എത്തിയ നാട്ടുകാർ കാണുന്നത് കറുത്ത കണ്ണട ഊരി മാറ്റിയശേഷം കൈവശം ഉണ്ടായിരുന്ന പണം എണ്ണി തിട്ടപ്പെടുന്നതാണ്. ഇത് നാട്ടുകാർ കയ്യോടെ പിടികൂടുകയായിരുന്നു.