ആഫ്രിക്കൻ രാജ്യമായ മൊസാംബിക്കിൽ ബോട്ട് മറിഞ്ഞ് കാണാതായ രണ്ട് മലയാളികളിൽ ഒരാൾ മരിച്ചതായി സ്ഥിരീകരിച്ചു. കൊല്ലം തേവലക്കര സ്വദേശിയായ 36 വയസ്സുള്ള ശ്രീരാഗ് രാധാകൃഷ്ണൻ ആണ് മരിച്ചത്. അദ്ദേഹത്തിന്റെ മൃതദേഹം തിരിച്ചറിഞ്ഞതായി കുടുംബത്തെ ഔദ്യോഗികമായി അറിയിച്ചു.

കഴിഞ്ഞ കുറച്ചു വർഷങ്ങളായി ശ്രീരാഗ് ഇതേ കപ്പലിലാണ് ജോലി ചെയ്തിരുന്നത്. മൃതദേഹം നാട്ടിലെത്തിക്കാനുള്ള നടപടിക്രമങ്ങൾ ആരംഭിച്ചു. വെള്ളിയാഴ്ചയാണ് അപകടം നടന്നതെന്ന് ഇന്ത്യൻ ഹൈക്കമ്മീഷൻ പുറത്തുവിട്ട വിവരത്തിൽ പറയുന്നു. കടൽത്തീരത്ത് നങ്കൂരമിട്ട എം.ടി. സീ ക്വസ്റ്റ് എന്ന എണ്ണക്കപ്പലിലെ നാവികരാണ് അപകടത്തിൽപ്പെട്ടത്. മലയാളികൾ ഉൾപ്പെടെ അഞ്ചുപേരെയാണ് അപകടത്തെ തുടർന്ന് കാണാതായത്. കാണാതായവരിൽ ഉൾപ്പെട്ട മറ്റൊരു മലയാളി പിറവം സ്വദേശിയായ ഇന്ദ്രജിത്ത് ആണ്. 22 വയസ്സുകാരനായ ഇന്ദ്രജിത്ത് കഴിഞ്ഞ ചൊവ്വാഴ്ചയാണ് വീട്ടിൽ നിന്ന് കപ്പലിൽ ജോലിക്കായി പോയത്. കപ്പലിൽ ജോലി ചെയ്യുന്ന ഇന്ദ്രജിത്തിന്റെ പിതാവ് സന്തോഷ് നിലവിൽ മൊസാംബിക്കിൽ എത്തിയിട്ടുണ്ട്.