തിരുവനന്തപുരം: ശബരിമല ശ്രീകോവിലിന്റെ വാതിൽ പ്രദർശിപ്പിച്ച് ഉണ്ണികൃഷ്ണൻ പോറ്റി പണപ്പിരിവ് നടത്തിയതായി ബെംഗളൂരുവിലെ ശ്രീരാംപുര അയ്യപ്പക്ഷേത്രം ട്രസ്റ്റ് സെക്രട്ടറിയുടെ വെളിപ്പെടുത്തൽ. അറസ്റ്റു ചെയ്യുന്നതിനു തൊട്ടുമുമ്പായി ഉണ്ണികൃഷ്ണൻ പോറ്റി ഈ ക്ഷേത്രത്തിൽ എത്തി പ്രാർത്ഥിച്ചുവെന്നും ശേഷം ആരോടും സംസാരിക്കാതെ മടങ്ങിപ്പോയെന്നും ട്രസ്റ്റ് സെക്രട്ടറി എൻ.എസ്. വിശ്വംഭരൻ മാധ്യമങ്ങളോട് പറഞ്ഞു. ബെംഗളൂരുവിൽ പണം നഷ്ടപ്പെട്ടവർ ക്ഷേത്രത്തിലെത്തി പരാതി പറഞ്ഞിരുന്നു. വ്യവസായികൾ ഉൾപ്പെടെ നിരവധി പേർ പരാതിയുമായി ക്ഷേത്രത്തിൽ എത്തിയിരുന്നതായും അദ്ദേഹം വെളിപ്പെടുത്തി.

എന്നാൽ എത്രപേർക്ക് പണം നഷ്ടപ്പെട്ടു എന്നു വ്യക്തമല്ലെന്നും ക്ഷേത്രത്തിന് സ്വർണ്ണത്തട്ടിപ്പുമായി ബന്ധപ്പെട്ട വിവാദങ്ങളിൽ ഒരു ബന്ധവുമില്ലെന്നും എൻ.എസ്. വിശ്വംഭരൻ വ്യക്തമാക്കി. ഇടപാടുകൾ എല്ലാം ഉണ്ണികൃഷ്ണൻ പോറ്റി നേരിട്ടാണെന്നും, ഉണ്ണികൃഷ്ണൻ പോറ്റിയും സഹായി രമേശ് റാവുമാണ് വാതിൽ പ്രദർശനത്തിന് നേതൃത്വം നൽകിയത് എന്നാണ് സൂചനയെന്നും അദ്ദേഹം പറഞ്ഞു. ശബരിമല ശ്രീകോവിലിന്റെ പുതിയ വാതിൽ ബംഗളൂരുവിൽ പ്രദർശിപ്പിച്ചതിന്റെ ദൃശ്യങ്ങൾ പുറത്തെത്തിയിരുന്നു.