എറണാകുളം വടക്കൻ പറവൂരിൽ മൂന്നര വയസ്സുള്ള കുഞ്ഞിന് നേരെ തെരുവുനായയുടെ ആക്രമണം. കളിച്ചുകൊണ്ടിരുന്ന നിഹാര എന്ന കുട്ടിയെ തെരുവുനായ ചെവിയിൽ കടിക്കുകയും മറിച്ചിടുകയും ചെയ്യുകയായിരുന്നു. ആക്രമണത്തിൽ കുട്ടിയുടെ ചെവിക്ക് ഏകദേശം ഒരു ഇഞ്ചോളം ഗുരുതരമായി പരിക്കേൽക്കുകയും ഭാഗികമായി അടർന്നുപോകുകയും ചെയ്തിട്ടുണ്ട്. ഇന്ന് വൈകുന്നേരം നാലരയോടെയാണ് സംഭവം നടന്നത്. കൂട്ടമായി വന്ന മൂന്ന് തെരുവുനായകളിൽ ഒരെണ്ണമാണ് കുട്ടിയെ ആക്രമിച്ചത്. ഉടൻതന്നെ കളമശ്ശേരി മെഡിക്കൽ കോളേജിൽ പ്രവേശിപ്പിച്ച കുട്ടിയെ പ്രാഥമിക ചികിത്സകൾക്ക് ശേഷം കൂടുതൽ വിദഗ്ധ ചികിത്സയ്ക്കായി മെഡിക്കൽ ട്രസ്റ്റ് ആശുപത്രിയിലേക്ക് മാറ്റി.
ചെവിയിൽ ഗുരുതരമായി പരിക്കേറ്റ കുട്ടിക്ക് പേവിഷബാധ പ്രതിരോധത്തിനായി അഞ്ച് ഇൻജക്ഷനുകൾ നൽകി. നിലവിൽ കുട്ടിയെ പ്ലാസ്റ്റിക് സർജറി വിഭാഗത്തിൽ പ്രവേശിപ്പിച്ചിരിക്കുകയാണ്. ചികിത്സ പുരോഗമിക്കുന്നു. ആക്രമണത്തിന് പിന്നാലെ നായയെ ചത്ത നിലയിൽ കണ്ടെത്തിയതോടെ പേവിഷബാധ (റാബീസ് വൈറസ്) സംശയം ശക്തമായി. നായയുടെ ശരീരം പരിശോധനയ്ക്കായി അയക്കുമെന്ന് മെഡിക്കൽ അധികൃതർ അറിയിച്ചു.കുട്ടിയുടെ ആരോഗ്യനില താൽക്കാലികമായി സ്ഥിരമാണെങ്കിലും പേവിഷബാധ സംശയമുള്ള സാഹചര്യത്തിൽ അടുത്ത ദിവസങ്ങൾ നിർണായകമായിരിക്കുമെന്ന് ഡോക്ടർമാർ അറിയിച്ചു.