തിരുവനന്തപുരം: ശബരിമലയിൽ ഏറ്റവും കൂടുതൽ തട്ടിപ്പ് നടന്നിട്ടുള്ളത് ഉമ്മൻചാണ്ടി സർക്കാറിന്റെ കാലത്താണെന്ന് മന്ത്രി സജി ചെറിയാൻ. ഇന്നിപ്പോൾ യുഡിഎഫിന് ശബരിമലയുടെ കാര്യത്തിൽ നൊമ്പരവും കണ്ണുനീരും ആണ്. എന്നാൽ എന്തിനാണ് പ്രതിഷേധങ്ങൾ നടക്കുന്നത് എന്നു പോലും പ്രതിപക്ഷത്തിന് അറിയില്ലെന്നും സജി ചെറിയാൻ വ്യക്തമാക്കി. യുഡിഎഫ് ഭരണകാലത്ത് ശബരിമലയിലേക്കുള്ള റോഡുകൾ നശിച്ച നിലയിലായിരുന്നു. അന്ന് റോഡുകളിൽ മികച്ച കുണ്ടും കുഴിയും കാണാമായിരുന്നുവെന്നും അദ്ദേഹം പറഞ്ഞു. റോഡിലൂടെ പോകുന്നവർ തിരിച്ചു നട്ടെല്ലില്ലാതെ വരുന്ന കാലമായിരുന്നു അത് . ദേവസ്വം ബോർഡ് അംഗം പി.ഡി സന്തോഷ് കുമാറിന് സിപിഐഎം നൽകിയ സ്വീകരണ യോഗത്തിൽ ആയിരുന്നു മന്ത്രിയുടെ പരാമർശം.

അതേസമയം ശബരിമല സ്വർണ തട്ടിപ്പിൽ ദേവസ്വം ബോർഡിനെ വെട്ടിലാക്കുന്ന തരത്തിലുള്ള തെളിവുകൾ പുറത്ത്. 2019-ൽ കട്ടിളപ്പാളി കൊണ്ടുപോയതിനെക്കുറിച്ച് ബോർഡ് അറിഞ്ഞിരുന്നില്ല എന്ന വാദം നിലനിൽക്കാത്ത തരത്തിലുള്ള തെളിവുകളാണ് പുറത്തുവന്നത്. സെക്രട്ടറി പുറത്തിറക്കുന്ന ഉത്തരവ് ദേവസ്വം ബോർഡിന്റെ തീരുമാനപ്രകാരമാണെന്ന് തെളിയിക്കുന്ന പകർപ്പ് പുറത്തായി. 2013-ലാണ് ദേവസ്വം ആക്ട് ഭേദഗതി ചെയ്തത്. ദേവസ്വം ബോർഡ് യോഗങ്ങളിൽ സെക്രട്ടറിക്ക് കൺവീനർ സ്ഥാനവും ദേവസ്വം ബോർഡ് പ്രസിഡന്റിന് ചെയർമാൻ സ്ഥാനവുമാണുള്ളത്.