തിരുവനന്തപുരം: ശബരിമലയിലെ സ്വർണ്ണപ്പാളി വിവാദവുമായി ബന്ധപ്പെട്ട് ഹൈക്കോടതിയുടെ നിർദ്ദേശപ്രകാരം ജസ്റ്റിസ് കെ.ടി. ശങ്കരൻ ശനിയാഴ്ച സന്നിധാനത്തും. ശബരിമലയിലെ സ്ട്രോങ് റൂമുകൾ തുറന്നുള്ള വിശദമായ പരിശോധനയ്ക്കായാണ് ജസ്റ്റിസ് കെ.ടി. ശങ്കരൻ സന്നിധാനത്ത് എത്തുന്നത്.സ്ട്രോങ് റൂമുകളിലുള്ള മുഴുവൻ വസ്തുക്കളുടെയും കണക്ക് കൃത്യമായി രേഖപ്പെടുത്തി ഹൈക്കോടതിക്ക് മുൻപാകെ സമർപ്പിക്കണമെന്നും നിർദ്ദേശമുണ്ട്.

സന്നിധാനത്തുള്ള 18 സ്ട്രോങ് റൂമുകളും തുറന്ന് പരിശോധിക്കാനാണ് കോടതി നിർദ്ദേശം നൽകിയിരിക്കുന്നത്. ദേവസ്വം വിജിലൻസ് നടത്തിയ പ്രാഥമിക പരിശോധനയിൽ ദ്വാരപാലക സ്വർണ്ണപ്പാളിയുടെ രജിസ്ട്രേഷനിൽ ഗുരുതരമായ വീഴ്ച സംഭവിച്ചതായാണ് കണ്ടെത്തിയിരുന്നത്. തുടർന്നാണ് ഹൈക്കോടതി സ്ട്രോങ് റൂം പരിശോധനയ്ക്ക് ഉത്തരവിട്ടത്.

അതേസമയം, ശബരിമല സ്വർണ്ണപ്പാളി വിവാദത്തിൽ പ്രത്യേക അന്വേഷണ സംഘം അനൗദ്യോഗിക അന്വേഷണം ആരംഭിച്ചു. രണ്ട് എസ്.ഐ.മാർ ഇന്നലെ വൈകിട്ടോടെ തിരുവിതാംകൂർ ദേവസ്വം ബോർഡ് ആസ്ഥാനത്ത് എത്തി വിജിലൻസ് എസ്.പിയുമായി കൂടിക്കാഴ്ച നടത്തിയതായാണ് സൂചന. വിജിലൻസിന്റെ അന്തിമ റിപ്പോർട്ട് കോടതിയിൽ സമർപ്പിച്ച ശേഷം ഔദ്യോഗികമായി അന്വേഷണം തുടങ്ങാനാണ് പ്രത്യേക സംഘത്തിന്റെ തീരുമാനം.