തിരുവനന്തപുരം: സംസ്ഥാനത്തെ കാൻസർ രോഗികൾക്ക് കെഎസ്ആർടിസി ബസുകളിൽ ഇനിമുതൽ സൗജന്യ യാത്ര അനുവദിക്കുമെന്ന് ഗതാഗത മന്ത്രി കെ.ബി. ഗണേഷ് കുമാർ. നിയമസഭയിൽ വെച്ചാണ് മന്ത്രി സുപ്രധാന പ്രഖ്യാപനം നടത്തിയത്. നിയമസഭാ, തദ്ദേശ സ്വയംഭരണ തിരഞ്ഞെടുപ്പുകൾ അടുത്തിരിക്കുന്ന സാഹചര്യത്തിലാണ് സർക്കാരിന്റെ ഈ സുപ്രധാന തീരുമാനം.സൗജന്യ യാത്ര സൂപ്പർ ഫാസ്റ്റ് മുതലുള്ള താഴേക്കുള്ള ബസുകളിലായിരിക്കും അനുവദിക്കുക. മാത്രമല്ല, സ്വകാര്യ ആശുപത്രികളിൽ ചികിത്സ തേടുന്ന കാൻസർ രോഗികൾക്കും ഈ സൗകര്യം ലഭ്യമാകും. വിഷയത്തിൽ കെഎസ്ആർടിസി ഡയറക്ടർ ബോർഡ് ഉടൻ തീരുമാനമെടുത്ത് പ്രഖ്യാപനം നടത്തുമെന്നും മന്ത്രി സഭയിൽ അറിയിച്ചു.

എന്നാൽ, ​ഗതാ​ഗതമന്ത്രി ഇതുസംബന്ധിച്ച പ്രഖ്യാപനം നടത്തുന്നതിനിടെ ബഹളം വെച്ച പ്രതിപക്ഷത്തിനെതിരെ മന്ത്രി ശക്തമായ വിമർശനം ഉന്നയിച്ചു. പ്രഖ്യാപനം കേട്ടപ്പോൾ പ്രതിപക്ഷം "ഷെയിം ഷെയിം" എന്ന് ആക്രോശിക്കുകയായിരുന്നു. ഇതിനെയാണ് മന്ത്രി ​ഗണേഷ് കുമാർ വിമർശിച്ചത്. പ്രതിപക്ഷത്തിന് ഇത് ഒരുപക്ഷേ വലിയ കാര്യമല്ലായിരിക്കാം. ലജ്ജാകരമായി തോന്നിയേക്കാം. പക്ഷേ കാൻസർ രോഗികളെ സംബന്ധിച്ച് ഇത് വളരെ വലിയൊരു പ്രഖ്യാപനമാണെന്ന് ഗതാഗത മന്ത്രി സഭയിൽ പറഞ്ഞു.

അതേസമയം, നിയമസഭയിൽ നടന്ന അതിരുകടന്ന പ്രതിഷേധവുമായി ബന്ധപ്പെട്ട് മൂന്ന് കോൺഗ്രസ് എംഎൽഎമാർക്ക് സസ്പെൻഷൻ ലഭിച്ചു. കോൺ​ഗ്രസിന്റെ എംഎൽഎമാരായ റോജി എം. ജോൺ, എം. വിൻസന്റ്, സനീഷ് കുമാർ ജോസഫ് എന്നിവർക്കാണ് നടപടി നേരിട്ടത്. പ്രതിപക്ഷ പ്രതിഷേധത്തിനിടെ വാച്ച് ആൻഡ് വാർഡിനെ മർദ്ദിച്ചതിനെ തുടർന്നാണ് സസ്പെൻഷൻ നൽകിയത്. സുരക്ഷാ ചുമതലയുള്ള ചീഫ് മാർഷൽ ഷിബുവിനെ ഗുരുതരമായി ആക്രമിച്ചെന്നാണ് റിപ്പോർട്ട്. പരിക്കേറ്റ അദ്ദേഹത്തിന് ശസ്ത്രക്രിയ ആവശ്യമാണെന്നും വിവരമുണ്ട്.