തിരുവനന്തപുരം: ശബരിമല സ്വർണ്ണപ്പാളി വിവാദവുമായി ബന്ധപ്പെട്ട്, അന്നത്തെ അഡ്മിനിസ്‌ട്രേറ്റീവ് ഓഫീസറായിരുന്ന തിരുവിതാംകൂർ ദേവസ്വം ബോർഡിലെ ബി. മുരാരി ബാബുവിനെ സസ്‌പെൻഡ് ചെയ്തു. നിലവിൽ ഹരിപ്പാട് ഡെപ്യൂട്ടി ദേവസ്വം കമ്മീഷണറാണ് മുരാരി ബാബു.അന്വേഷണ വിധേയമായാണ് ദേവസ്വം ബോർഡ് സസ്‌പെൻഡ് ചെയ്തത്.സ്വർണം പൂശിയ ദ്വാരപാലക ശിൽപങ്ങളെ 'ചെമ്പ് തകിട്' എന്ന് റിപ്പോർട്ടിൽ തെറ്റായി രേഖപ്പെടുത്തിയതിനാണ് നടപടി.
2019 ജൂൺ 17-നാണ് ഉദ്യോഗസ്ഥൻ ഗുരുതര വീഴ്ച വരുത്തിയത്. അന്ന് ബി . മുരാരി ബാബു ശബരിമല അഡ്മിനിസ്‌ട്രേറ്റീവ് ഓഫീസറാണ്. ശബരിമല എക്‌സിക്യൂട്ടീവ് ഓഫീസർക്ക് നൽകിയ റിപ്പോർട്ടിലാണ് മുരാരി ബാബു വീഴ്ച്ച വരുത്തിയത്. അതേസമയം, ചെമ്പ് തെളിഞ്ഞതിനാലാണ് വീണ്ടും പൂശാനായി നൽകിയതെന്നാണ് സംഭവത്തിൽ മുരാരി ബാബു നൽകിയ വിശദീകരണം.
തിരുവാഭരണ കമ്മീഷണർ ഓഫീസിലെ ഉദ്യോഗസ്ഥർ ഉൾപ്പെടെയുള്ളവർ പരിശോധിച്ച ശേഷമാണ് 2019-ൽ ശിൽപ്പം ഇളക്കിക്കൊണ്ടുപോയതെന്നും അദ്ദേഹം പറഞ്ഞു. ഇളക്കി മാറ്റുന്ന സമയത്താണ് പൂർണ്ണമായ ഭൗതിക പരിശോധന നടന്നതെന്നും അപ്പോഴും കമ്മീഷണർ ഓഫീസിലെ ഉദ്യോഗസ്ഥർ സ്ഥലത്ത് ഉണ്ടായിരുന്നതായും അദ്ദേഹം പറയുന്നു. സ്വർണം പൂശിയത് തെളിഞ്ഞ് ചെമ്പായ ഭാഗങ്ങൾ വീണ്ടും പൂശാൻ അനുമതി നൽകിയെന്നാണ് താൻ റിപ്പോർട്ട് ചെയ്തതെന്നും അദ്ദേഹം മാധ്യമങ്ങളോട് പ്രതികരിച്ചു.