ഗാസയിൽ സമാധാനം പുനഃസ്ഥാപിക്കാൻ യുണൈറ്റഡ് സ്റ്റേറ്റ്സ് പ്രസിഡന്റ് ഡൊണാൾഡ് ട്രംപ് മുന്നോട്ടുവെച്ച നിർദ്ദേശങ്ങളോടുള്ള ഹമാസിന്റെ പ്രതികരണത്തെ സൗദി അറേബ്യ ഉൾപ്പെടെയുള്ള എട്ട് അറബ്, ഇസ്ലാമിക രാജ്യങ്ങൾ സ്വാഗതം ചെയ്തു. സൗദിക്കൊപ്പം ജോർദാൻ, യുണൈറ്റഡ് അറബ് എമിറേറ്റ്‌സ് (യുഎഇ), ഇന്തോനേഷ്യ, പാകിസ്താൻ, തുർക്കി, ഖത്തർ, ഈജിപ്ത് എന്നീ രാജ്യങ്ങളിലെ വിദേശകാര്യ മന്ത്രിമാരാണ് സംയുക്ത പ്രസ്താവനയിലൂടെ ഹമാസിന്റെ നിലപാടിനെ അനുകൂലിച്ചത്.
ഗാസയിൽ സമാധാനം കൊണ്ടുവരാനായി യു.എസ്. പ്രസിഡന്റ് ഡൊണാൾഡ് ട്രംപ് മുന്നോട്ടുവെച്ച പ്രധാന നിർദ്ദേശങ്ങളിൽ, ഇസ്രയേൽ യുദ്ധം ഉടൻ അവസാനിപ്പിക്കുക, മാനുഷിക സഹായം തടസ്സമില്ലാതെ എത്തിക്കുക, പലസ്തീൻ ജനതയുടെ വാസസ്ഥലങ്ങൾ സംരക്ഷിക്കുക, ബന്ദികളെ വിട്ടയയ്ക്കുക, പലസ്തീൻ അതോറിറ്റിയെ ഗാസയിൽ തിരികെ കൊണ്ടുവരിക, ഒപ്പം ഗാസയെയും വെസ്റ്റ് ബാങ്കിനെയും ഏകീകരിക്കുക എന്നിവ ഉൾപ്പെടുന്നു.
ഈ നിർദ്ദേശങ്ങൾ നടപ്പാക്കാനുള്ള സംവിധാനങ്ങളെക്കുറിച്ച് ഉടൻ ചർച്ചകൾ ആരംഭിക്കാനും യു.എസ്. പ്രസിഡന്റ് ആവശ്യപ്പെട്ടിട്ടുണ്ട്. ട്രംപിന്റെ ഈ സമാധാന ശ്രമങ്ങളെ വിവിധ രാജ്യങ്ങൾ സ്വാഗതം ചെയ്തതിനൊപ്പം, ഗാസ മുനമ്പിൽ സ്ഥിരമായ സമാധാനം ഉണ്ടാകണമെന്നും, അവിടുത്തെ ജനങ്ങൾ നേരിടുന്ന ഭീകരമായ സാഹചര്യങ്ങൾ ചർച്ചയാകണമെന്നും വിദേശകാര്യ മന്ത്രിമാർ ആവശ്യപ്പെട്ടു.
ഗാസയുടെ ഭരണം സ്വതന്ത്ര സാങ്കേതിക വിദഗ്ധർ ഉൾപ്പെടുന്ന ഒരു താത്കാലിക പലസ്തീനിയൻ ഭരണ സമിതിക്ക് കൈമാറാനുള്ള ഹമാസിന്റെ പ്രഖ്യാപനത്തെയും വിദേശകാര്യ മന്ത്രിമാർ സ്വാഗതം ചെയ്തു. ഈ നിർദ്ദേശം നടപ്പാക്കുന്നതിനുള്ള സംവിധാനങ്ങൾ അംഗീകരിക്കുന്നതിനും അതിന്റെ എല്ലാ വശങ്ങളെയും അഭിസംബോധന ചെയ്യുന്നതിനും ഉടൻ ചർച്ചകൾ ആരംഭിക്കേണ്ടതിന്റെ ആവശ്യകതയും അവർ ഊന്നിപ്പറഞ്ഞു.