ന്യൂഡൽഹി: സി.എം.ആർ.എൽ.-എക്സാലോജിക് മാസപ്പടി കേസിൽ വിജിലൻസ് അന്വേഷണം ആവശ്യപ്പെട്ട് മാത്യു കുഴൽനാടൻ എം.എൽ.എ. സമർപ്പിച്ച ഹർജി സുപ്രീംകോടതി തള്ളി. ഹർജിയിൽ ഇടപെടാൻ സാധിക്കില്ലെന്ന് കോടതി വ്യക്തമാക്കി. ഹൈക്കോടതിയുടെ ഉത്തരവിനെതിരെയാണ് മാത്യു കുഴൽനാടൻ സുപ്രീംകോടതിയെ സമീപിച്ചത്. 'രാഷ്ട്രീയ പോരാട്ടത്തിന് കോടതി വേദിയാക്കരുത്' എന്നും സുപ്രീം കോടതി വിമർശിച്ചു. ചീഫ് ജസ്റ്റിസ് ബി.ആർ. ഗവായി, ജസ്റ്റിസ് കെ. വിനോദ് ചന്ദ്രൻ എന്നിവരടങ്ങിയ ബെഞ്ചാണ് ഹർജി തള്ളിയത്.

"രാഷ്ട്രീയ പോരാട്ടത്തിന് കോടതി വേദിയാക്കരുത്. രാഷ്ട്രീയ പോരാട്ടങ്ങൾ നടത്തേണ്ടത് തിരഞ്ഞെടുപ്പിൽ വോട്ടർമാർക്ക് മുന്നിലാണ്," എന്ന് ചീഫ് ജസ്റ്റിസ് ബി.ആർ. ഗവായി രൂക്ഷമായി വിമർശിച്ചു. മുഖ്യമന്ത്രിയുടെ മകൾ എന്ന ആനുകൂല്യം ഉപയോഗപ്പെടുത്തി വീണാ വിജയൻ സി.എം.ആർ.എല്ലിൽ നിന്ന് മാസപ്പടി കൈപ്പറ്റി എന്നതായിരുന്നു പ്രധാന ആരോപണം. ഈ ആവശ്യം ആദ്യം വിജിലൻസ് കോടതിയും പിന്നീട് ഹൈക്കോടതിയും തള്ളിയിരുന്നു.

എക്സാലോജിക് കമ്പനിക്കും മുഖ്യമന്ത്രിയുടെ മകൾ വീണ വിജയനും സി.എം.ആർ.എൽ. കമ്പനി നൽകിയ 1.72 കോടി രൂപ മുഖ്യമന്ത്രിക്ക് നൽകിയ കൈക്കൂലിയാണ് എന്ന മാത്യു കുഴൽനാടന്റെ ഹർജിയിലെ പരാമർശത്തെയും സുപ്രീംകോടതി രൂക്ഷമായി വിമർശിച്ചു. എപ്രകാരമാണ് ഇത്തരത്തിൽ ഒരു ആരോപണം ഉന്നയിക്കുന്നതെന്ന് മാത്യു കുഴൽനാടന് വേണ്ടി ഹാജരായ സീനിയർ അഭിഭാഷകനായ ഗുരുകൃഷ്ണ കുമാറിനോട് സുപ്രീംകോടതി ചോദിച്ചു.