കൊച്ചി: കോൺഗ്രസ് എംഎൽഎ മാത്യു കുഴൽനാടനെ 'ശല്യക്കാരനായ വ്യവഹാരി' എന്ന് അധിക്ഷേപിച്ച് സിപിഐഎം കേന്ദ്രകമ്മിറ്റി അംഗം ഇ.പി. ജയരാജൻ. കോൺഗ്രസ് ചളിക്കുണ്ടിലാണ്, അതിനെ നന്നാക്കാനാണ് അവർ ശ്രമിക്കേണ്ടതെന്ന് ജയരാജൻ പറഞ്ഞു. ജനകീയ കോടതി മാത്യു കുഴൽനാടനെ ശിക്ഷിക്കുമെന്നും അദ്ദേഹം കൂട്ടിച്ചേർത്തു.
സിഎംആർഎൽ-എക്‌സാലോജിക് വിഷയത്തിൽ വിജിലൻസ് അന്വേഷണം ആവശ്യപ്പെട്ട് കുഴൽനാടൻ എംഎൽഎ നൽകിയ അപ്പീൽ ഹർജി സുപ്രീംകോടതി തള്ളിയതിന് തൊട്ടുപിന്നാലെയായിരുന്നു ഇ.പി. ജയരാജന്റെ ഈ പ്രതികരണം. ശബരിമലയിലെ സ്വർണപ്പാളി വിവാദത്തിലും സിപിഐഎം കേന്ദ്രകമ്മിറ്റി അംഗം ഇ.പി. ജയരാജൻ പ്രതികരിച്ചു. ഒരാളുടെയും വിശ്വാസത്തെയോ ആചാരത്തെയോ തകർക്കാൻ സർക്കാർ കൂട്ടുനിൽക്കില്ലെന്നും, ഒരു കുറ്റവാളിയെയും രക്ഷപ്പെടാൻ അനുവദിക്കില്ലെന്നും അദ്ദേഹം വ്യക്തമാക്കി.
"സത്യം കണ്ടെത്തി കുറ്റവാളികളെ ശിക്ഷിക്കണം. ഇതാണ് സർക്കാരിന്റെയും ദേവസ്വത്തിന്റെയും നിലപാട്. ഇതുവരെ പ്രതിപക്ഷം എവിടെയായിരുന്നു? അയ്യപ്പ സംഗമം സർക്കാരിന് സൽപേരുണ്ടാക്കി. ഈ വിവാദങ്ങൾ അയ്യപ്പ സംഗമത്തിന് ശേഷമാണ് ഉയർന്നുവന്നത്. അന്വേഷണത്തിൽ കൂടുതൽ കാര്യങ്ങൾ വ്യക്തമാകും," ഇ.പി. ജയരാജൻ പറഞ്ഞു.