തിരുവനന്തപുരം: ശബരിമലയിലെ ദ്വാരപാലക ശിൽപ്പങ്ങളിലെ കവചം 2019-ൽ ചെന്നൈയിലേക്ക് കൊണ്ടുപോകുന്നതിന് മുൻപ് സ്വർണ്ണത്തിൽ തന്നെയായിരുന്നുവെന്നതിന്റെ തെളിവുകൾ പുറത്ത്. 2019 ഏപ്രിൽ മാസത്തെ ദൃശ്യങ്ങളാണ് ലഭിച്ചത്. 2019 ജൂലൈ മാസത്തിലാണ് സ്വർണ്ണം പൂശുന്നതിനായി ശിൽപ്പങ്ങൾ കൊണ്ടുപോയത്. എന്നാൽ ഇതിന് മൂന്ന് മാസം മുൻപുള്ള ദൃശ്യങ്ങളിൽ കവചം സ്വർണ്ണമാണെന്ന് തെളിയിക്കുന്ന വിവരങ്ങളാണുള്ളത്. ശബരിമലയിലെ ശ്രീകോവിലിന്റെ വാതിലുകൾ അറ്റകുറ്റപ്പണിക്കായി കൊണ്ടുപോയത് സ്മാർട്ട് ക്രിയേഷൻസായിരുന്നു. സ്മാർട്ട് ക്രിയേഷനിലെ ആളുകളാണ് പിന്നീട് വാതിൽ ഘടിപ്പിച്ചത്. ആ സമയത്തുള്ള ദൃശ്യങ്ങളാണ് ഇപ്പോൾ റിപ്പോർട്ടർ പുറത്തുവിട്ടിരിക്കുന്നത്.

ദ്വാരപാലക ശിൽപ്പങ്ങളിലെ കവചം 2019 ഏപ്രിലിൽ സ്വർണ്ണത്തിൽ തന്നെയായിരുന്നുവെന്ന് തെളിയിക്കുന്ന ദൃശ്യങ്ങൾ പുറത്തുവന്നതോടെ, ഉണ്ണിക്കൃഷ്ണൻ പോറ്റിയുടെ മുൻ വാദങ്ങൾ ചോദ്യം ചെയ്യപ്പെടുകയാണ്. സ്വർണം പൂശുന്നതിനായി തനിക്ക് നൽകിയത് ചെമ്പുപാളികളാണ് എന്നായിരുന്നു പോറ്റി നേരത്തെ ആരോപിച്ചിരുന്നത്. സ്വർണ്ണം പൂശാൻ കൊണ്ടുപോയ ജൂലൈ മാസത്തിന് മൂന്ന് മാസം മുൻപുള്ള ദൃശ്യങ്ങളാണിത്. വ്യവസായി വിജയ് മല്യയാണ് 1998-ൽ ശബരിമല ശ്രീകോവിലിലും ദ്വാരപാലക ശിൽപ്പങ്ങളിലും പീഠങ്ങളിലും സ്വർണം പൊതിഞ്ഞ് നൽകിയത്. 2019-ൽ ഇതിന് മങ്ങലേറ്റതോടെ, സ്വർണം പൂശി നൽകണമെന്ന് ആവശ്യപ്പെട്ട് ദേവസ്വം ബോർഡ് ഉണ്ണിക്കൃഷ്ണൻ പോറ്റിയെ സമീപിക്കുകയായിരുന്നു.