നിറത്തിന്റെ പേരിൽ നടൻ കലാഭവൻ മണിയെ അപമാനിച്ചുവെന്ന ആരോപണം നടി ദിവ്യ ഉണ്ണി വർഷങ്ങളായി നേരിടുകയാണ്. ഇപ്പോഴിതാ വിവാദങ്ങൾക്ക് വിരാമം ഇട്ടിരിക്കുകയാണ് സംവിധായകൻ വിനയൻ. മണി അപമാനിച്ച നായിക ദിവ്യ ഉണ്ണി അല്ല എന്ന് വിനയൻ വ്യക്തമാക്കി. വിവാദത്തിന് ആസ്പദമായ സംഭവം നടന്നത് 'കല്യാണ സൗഗന്ധികം' എന്ന സിനിമയുടെ സെറ്റിലായിരുന്നില്ല. യഥാർഥ സംഭവം 'വാസന്തിയും ലക്ഷ്മിയും പിന്നെ ഞാനും' എന്ന സിനിമയുമായി ബന്ധപ്പെട്ടായിരുന്നു എന്നും, ആ നടി ദിവ്യ ഉണ്ണി അല്ലെന്നും വിനയൻ പറഞ്ഞു. സമൂഹ മാധ്യമത്തിലൂടെയാണ് വർഷങ്ങളായി ദിവ്യ ഉണ്ണിയെ വേട്ടയാടുന്ന വിവാദം വിനയൻ അവസാനിപ്പിച്ചത്.

വിനയൻ സംവിധാനം ചെയ്ത 'കല്യാണ സൗഗന്ധികം' എന്ന ചിത്രവുമായി ബന്ധപ്പെട്ടാണ് ദിവ്യ ഉണ്ണിക്കെതിരെ ഈ ആരോപണം ആദ്യം ഉയർന്നത്. കലാഭവൻ മണിയുടെ നായികയായി അഭിനയിക്കാൻ ബുദ്ധിമുട്ടുണ്ട് എന്ന് നടി പറഞ്ഞതായി വ്യാപകമായി വാർത്തകൾ പ്രചരിച്ചിരുന്നു. ഇതിന്റെ പേരിൽ ദിവ്യ വലിയ തരത്തിലുള്ള സൈബർ ആക്രമണങ്ങളും വിമർശനങ്ങളുമാണ് നേരിട്ടത്. ഈ വിഷയത്തിലാണ് ഇപ്പോൾ സംവിധായകൻ വിനയൻ തന്നെ സത്യം തുറന്നു പറഞ്ഞ് രം​ഗത്തെത്തിയിരിക്കുന്നത്.

‘യഥാർഥത്തിൽ സംഭവം ഈ സിനിമയുമായി (കല്യാണ സൗഗന്ധികം) ബന്ധപ്പെട്ടല്ല. ‘വാസന്തിയും ലക്ഷ്മിയും പിന്നെ ഞാനും’ എന്ന സിനിമയുടെ സമയത്താണ് പ്രശസ്തയായ ഒരു നടി അങ്ങനെ പറഞ്ഞത്. ആ നടിയുടെ പേര് ഞാൻ ഇതുവരെ വെളിപ്പെടുത്തിയിട്ടില്ല.’’ വിനയൻ പറഞ്ഞു. എന്നാൽ, ‘കല്യാണ സൗഗന്ധികം’ എന്ന ചിത്രത്തിൽ മണിയുമായി ലവ് സീനുള്ള ഒരു പാട്ട് എടുക്കാൻ പോവുകയാണെന്ന് അസിസ്റ്റന്റ് ഡയറക്ടർ പറഞ്ഞപ്പോൾ, ‘‘ഏയ് മണിച്ചേട്ടന്റെ കൂടെ ഞാനല്ല, എന്റെ ഹീറോ ദിലീപ് ചേട്ടനാണ്’’ എന്ന് ദിവ്യ പറഞ്ഞതിനെക്കുറിച്ച് മണി ഒരു ഇന്റർവ്യൂവിൽ തമാശ രൂപേണ അവതരിപ്പിച്ചിരുന്നു. ഇത് ശരിയായിരുന്നു.

ദിലീപിന്റെ നായികയാകാൻ ആദ്യമായി സിനിമയിലേക്ക് വന്ന ഒരു പതിനാലുകാരിയുടെ സ്വപ്നം നിറഞ്ഞ ആകാംക്ഷയായി മാത്രമേ താൻ അതിനെ കണ്ടിട്ടുള്ളൂ. കാര്യം പറഞ്ഞ് മനസ്സിലാക്കിയപ്പോൾ ദിവ്യ അത് ചെയ്യുകയും ചെയ്തു എന്നും ഇനിയെങ്കിലും ആളുകൾ സത്യം തിരിച്ചറിയണം എന്നുള്ളതുകൊണ്ടാണ് കാര്യങ്ങൾ തുറന്നു പറഞ്ഞതെന്നും വിനയൻ കൂട്ടിച്ചേർത്തു. അതേസമയം തനിക്കെതിരെയുള്ള ഈ വിവാദം നടി ദിവ്യ ഉണ്ണി നേരത്തെ തന്നെ നിഷേധിച്ചിരുന്നു. താനും മണി ചേട്ടനും ഒരുപാട് സിനിമകളിൽ ഒന്നിച്ച് അഭിനയിച്ചവരാണ്. ഇതിന്റെ സത്യാവസ്ഥ അദ്ദേഹത്തിന് അറിയാം. ഈ വിവാദത്തോടെ താൻ പ്രതികരിക്കുന്നത് തന്നെ അദ്ദേഹത്തോട് കാണിക്കുന്ന അനാഥരവാകും എന്നാണ് ദിവ്യ ഉണ്ണി പ്രതികരിച്ചത്.