ന്യൂഡൽഹി: കരൂരിൽ നടൻ വിജയിയുടെ പാർട്ടിയായ ടിവികെയുടെ റാലിക്കിടെ തിക്കിലും തിരക്കിലും പെട്ട് 41 പേർ മരിക്കാനിടയായ അപകടവുമായി ബന്ധപ്പെട്ട് കേന്ദ്ര ആഭ്യന്തര മന്ത്രാലയം വിശദീകരണം തേടി. നടനും രാഷ്ട്രീയ നേതാവുമായ വിജയ്ക്ക് നൽകിയ സുരക്ഷയിൽ വീഴ്ചയുണ്ടായോ എന്ന് അന്വേഷിച്ച് റിപ്പോർട്ട് നൽകാൻ സി.ആർ.പി.എഫിനോട് ആവശ്യപ്പെട്ടിട്ടുണ്ട്.

കഴിഞ്ഞ ഫെബ്രുവരി മുതൽ വിജയ്ക്ക് 'വൈ' കാറ്റഗറി സുരക്ഷ ഏർപ്പെടുത്തിയിരുന്നു. അതിൻ്റെ ഭാഗമായി സംസ്ഥാന പര്യടനം തുടങ്ങുന്നതിന് മുൻപ് അദ്ദേഹത്തിൻ്റെ സുരക്ഷ കൂടുതൽ ശക്തിപ്പെടുത്തുകയും ചെയ്തിരുന്നു. എന്നാൽ, അപകടം നടന്ന കരൂരിൽ വിജയ്ക്ക് നേരെ പലതവണ ചെരിപ്പേറുണ്ടായി എന്ന ആരോപണം ഉയർന്ന പശ്ചാത്തലത്തിലാണ് കേന്ദ്ര ആഭ്യന്തര മന്ത്രാലയം വിശദീകരണം തേടിയത്.

വിജയ്ക്ക് സുരക്ഷ ഏർപ്പെടുത്തുന്നതിൽ വീഴ്ച സംഭവിച്ചിട്ടുണ്ടോ? എങ്കിൽ എന്തുകൊണ്ട് അത് മുൻകൂട്ടി കാണാൻ കഴിഞ്ഞില്ല? തുടങ്ങിയ ചോദ്യങ്ങളും ആഭ്യന്തര മന്ത്രാലയം ഉയർത്തുന്നുണ്ട്. അതേസമയം കരൂർ അപകടത്തിൽ പ്രതിരോധത്തിലായ തമിഴക വെട്രി കഴകത്തിന് (ടി.വി.കെ.) കൂടുതൽ തലവേദനയുണ്ടാക്കുന്നത് സി.ബി.ഐ. അന്വേഷണത്തിലെ പാർട്ടിക്കുള്ളിലെ ഭിന്നതയാണ്.

സി.ബി.ഐ. അന്വേഷണത്തിലൂടെ ഗൂഢാലോചന പുറത്തുവരുമെന്നും പോലീസിൻ്റെ വീഴ്ചകൾ ചൂണ്ടിക്കാട്ടപ്പെടുമെന്നുമാണ് ടി.വി.കെ. ജനറൽ സെക്രട്ടറി ആദവ് അർജുനൻ്റെ പക്ഷം. എന്നാൽ, സി.ബി.ഐ. അന്വേഷണത്തിലൂടെ ടി.വി.കെയെ വരുതിയിലാക്കാൻ ബി.ജെ.പി. ശ്രമിക്കുമെന്നാണ് എൻ. ആനന്ദ് അഭിപ്രായപ്പെടുന്നത്. കോടതി തീരുമാനിക്കട്ടെ എന്ന നിലപാടിലാണ് പാർട്ടി നേതാവ് കൂടിയായ വിജയ്.

ഇതിനിടെ കരൂർ അപകടവുമായി ബന്ധപ്പെട്ട് നടൻ വിജയ്‌ക്കെതിരെ കേസെടുക്കണമെന്ന് ആവശ്യപ്പെട്ട് ചെന്നൈ സ്വദേശിയായ പി.എച്ച്. ദിനേശ് മദ്രാസ് ഹൈക്കോടതിയിൽ ഹർജി നൽകി. അപകടത്തിന് കാരണക്കാരൻ വിജയ് ആണെന്ന് ആരോപിച്ചുള്ള ഈ ഹർജി കോടതി നാളെ പരിഗണിക്കും.

ഡി.എം.കെ. നേതാക്കൾ വിജയ്‌ക്കെതിരെ കേസെടുക്കണമെന്ന ആവശ്യം ഉയർത്തിയെങ്കിലും, തിരക്കിട്ടുള്ള നീക്കം ബി.ജെ.പിക്ക് ഗുണം ചെയ്യുമെന്ന് മുഖ്യമന്ത്രി എം.കെ. സ്റ്റാലിൻ നിലപാടെടുത്തതായാണ് റിപ്പോർട്ട്. അതേസമയം, തമിഴ്‌നാട് ബി.ജെ.പി. നേതൃത്വം വിജയെ പിന്തുണയ്ക്കുന്നത് തുടരുകയാണ്.