ചെന്നൈ: കരൂർ ആൾക്കൂട്ട ദുരന്തത്തെ രാഷ്ട്രീയവൽക്കരിക്കാൻ താനില്ലെന്ന് എം.എൽ.എ സെന്തിൽ ബാലാജി. സങ്കൽപ്പിക്കാൻ പോലും സാധിക്കാത്ത ഭയാനകമായ ദുരന്തമാണ് ഉണ്ടായത് എന്നും, ഇത് മനസാക്ഷിയുടെ കാര്യമാണെന്നും അദ്ദേഹം നടൻ വിജയ്ക്ക് മറുപടി നൽകി.മരിച്ച 31 പേരിൽ മിക്കവരും കരൂർ സ്വദേശികളാണ്. ഇവരിൽ പലരെയും തനിക്ക് നേരിട്ട് അറിയാമെന്നും സെന്തിൽ ബാലാജി പറഞ്ഞു. കൂടാതെ, ടി.വി.കെ. (തമിഴക വെട്രി കഴകം) റാലിയിൽ പങ്കെടുക്കാൻ എത്തിയവർക്ക് കുടിവെള്ളം പോലും വിജയ് ഉറപ്പാക്കിയില്ലെന്നും സെന്തിൽ ബാലാജി കുറ്റപ്പെടുത്തി.

എം.എൽ.എ. സെന്തിൽ ബാലാജി വീഡിയോയിലൂടെയാണ് തൻ്റെ പ്രതികരണം അറിയിച്ചത്. തനിക്കെതിരെ ഉയർന്ന ആരോപണങ്ങളെല്ലാം പച്ചക്കള്ളമാണെന്നും ആരുടെയും മേൽ പഴിചാരാനില്ലെന്നും അദ്ദേഹം വ്യക്തമാക്കി. റാലിയിൽ പങ്കെടുക്കാൻ എത്തുന്നവർക്ക് അടിസ്ഥാന സൗകര്യങ്ങൾ പോലും ടി.വി.കെ. ഒരുക്കിയിരുന്നില്ല. എന്നാൽ, ഡി.എം.കെ. യോഗങ്ങളിൽ അങ്ങനെയല്ലെന്നും സെന്തിൽ ബാലാജി പറഞ്ഞു.

റാലിയുടെ വീഡിയോ ദൃശ്യങ്ങൾ ചൂണ്ടിക്കാട്ടിയാണ് അദ്ദേഹം വിശദീകരിച്ചത്. ദുരന്തം സംഭവിച്ച സ്ഥലത്ത് നൂറുകണക്കിന് ചെരുപ്പുകളാണ് ചിതറിക്കിടക്കുന്നത്. എന്നാൽ, ഒരു വെള്ളക്കുപ്പിയോ ബിസ്ക്കറ്റ് കവറോ കാണാനില്ല. അനുവദിച്ച സമയത്ത് വിജയ് കൃത്യമായി എത്തിയിരുന്നെങ്കിൽ ദുരന്തം ഉണ്ടാകില്ലായിരുന്നു. വിജയ് വരുന്നതിനു മുമ്പേ പ്രശ്നങ്ങൾ തുടങ്ങിയിരുന്നുവെന്നും ആളുകൾ കുഴഞ്ഞുവീഴാൻ തുടങ്ങിയിരുന്നുവെന്നും അദ്ദേഹം കൂട്ടിച്ചേർത്തു. അതേസമയം, വിജയ്ക്കു നേരെ ചെരിപ്പ് എറിഞ്ഞുവെന്ന ആരോപണത്തിൽ മറ്റാരെങ്കിലും ശ്രദ്ധ ക്ഷണിക്കുന്നതിനു വേണ്ടി ചെരിപ്പ് എറിഞ്ഞതാകാമെന്നും ബാലാജി വിശദീകരിച്ചു.

കരൂരിൽ മാത്രമല്ല എല്ലായിടത്തും പ്രശ്നങ്ങൾ ഉണ്ടായിരുന്നു. വിജയ് ആളുകളെ തെറ്റിദ്ധരിപ്പിക്കുവാൻ ശ്രമിക്കുകയാണ്. സ്വന്തം പിഴവുകൾ മറച്ചുവെച്ച് സർക്കാരിന്മേൽ പഴിചാരാനാണ് ശ്രമമെന്നും അദ്ദേഹം ആരോപിച്ചു. എവിടെയെങ്കിലും പ്രശ്നങ്ങൾ ഉണ്ടായാൽ ആളുകളെ സഹായിക്കാനായി അവിടേക്ക് പെട്ടെന്ന് എത്തുന്നത് തൻ്റെ ശീലമാണ്. അവരുടെ പാർട്ടി ഏതാണെന്ന് നോക്കിയല്ല താൻ കാര്യങ്ങളിൽ ഇടപെടാറുള്ളത്. "അല്ലാതെ താൻ എന്തു ചെയ്യണം ആയിരുന്നു, ടിക്കറ്റ് എടുത്ത് ചെന്നൈയ്ക്ക് പോകണമായിരുന്നോ," എന്നും ചോദിച്ച് അദ്ദേഹം വിജയ്‌യെ പരിഹസിച്ചു. ആശുപത്രിയിൽ എത്തുമ്പോൾ മറ്റ് പാർട്ടിക്കാരും അവിടെയുണ്ടായിരുന്നുവെന്നും സെന്തിൽ ബാലാജി പറഞ്ഞു.