തമിഴ്‌നാട്: കരൂർ ജില്ലയിൽ തമിഴക വെട്രി കഴകം (ടി.വി.കെ.) പ്രസിഡന്റ് വിജയ്‌യുടെ സംസ്ഥാന പര്യടനത്തിന്റെ ഭാ​ഗമായി നടന്ന റാലിയിൽ തിക്കിലും തിരക്കിലും പെട്ട് മരിച്ചവരുടെ എണ്ണം 40 ആയി. ദുരന്തത്തിൽ മരിച്ചവരുടെ കുടുംബങ്ങൾക്ക് വിജയ് 20 ലക്ഷം രൂപയും പരിക്കേറ്റവർക്ക് 2 ലക്ഷം രൂപയും സഹായധനം പ്രഖ്യാപിച്ചു. ചികിത്സയിലുള്ളവർക്ക് തമിഴക വെട്രി കഴകം ആവശ്യമായ എല്ലാ പിന്തുണയും നൽകുമെന്നും പാർട്ടി ചെയർമാൻ കൂടിയായ താരം തൻ്റെ ഏറ്റവും പുതിയ ട്വീറ്റിലൂടെ അറിയിച്ചു.

കരൂരിൽ നടന്ന വിജയ്‌യുടെ പ്രസംഗത്തിനിടെ 10 മിനിറ്റിനുള്ളിൽ തിക്കും തിരക്കും വർധിച്ചാണ് ദുരന്തമായി മാറിയത്. ദുരന്തത്തിന് മണിക്കൂറുകൾക്ക് മുൻപ്, നാമക്കലിലെ വിജയ്‌യുടെ റാലി ഇന്നലെ വൈകിട്ട് 3.30-നാണ് അവസാനിച്ചത്. തുടർന്ന് നൂറുകണക്കിന് ആരാധകർ വിജയ്‌യുടെ വാഹനത്തെ പിന്തുടരാൻ തുടങ്ങി. ജനങ്ങൾ വാഹനത്തെ പിന്തുടരുന്നത് തടയാനായി, നടനെ ആളുകൾ കാണാതിരിക്കാൻ കാരവാനിന്റെ ഗ്ലാസിട്ട വശത്തെ ജനൽ അടച്ചു. ഈ ജനൽ വഴിയായിരുന്നു ആളുകൾ നടനെ കണ്ടിരുന്നത്. ജനൽ അടച്ചാൽ ആളുകൾ പിന്തുടരുന്നത് അവസാനിപ്പിക്കുമെന്ന കണക്കുകൂട്ടൽ പിഴച്ചു. നടനെ കാണാനാകാത്ത നിരവധി പേർ വാഹനത്തെ പിന്തുടരുന്നത് തുടർന്നു. വാഹനത്തെ പിന്തുടരുതെന്ന നിർദേശം അവഗണിക്കപ്പെട്ടു.

അത്തരത്തിൽ രാവിലെ മുതൽ വിജയ്‌യെ കാത്തുനിൽക്കുന്ന വലിയ ജനക്കൂട്ടം കരൂരിലും ഉണ്ടായിരുന്നു. ഇതിനിടയിലേക്കാണ് വാഹനത്തോടൊപ്പം വലിയ ജനക്കൂട്ടവും എത്തിയത്. വിജയ് കരൂരിലെത്തിയപ്പോഴേക്കും രാത്രി 7 മണി കഴിഞ്ഞിരുന്നു, ഇതോടെ എല്ലാ നിയന്ത്രണങ്ങളും നഷ്ടമായി. വിജയ് സംസാരിച്ചു തുടങ്ങി 10 മിനിറ്റിനുള്ളിൽ തന്നെ ദുരന്തം സംഭവിച്ചതായി ദൃക്‌സാക്ഷികൾ മാധ്യമങ്ങളോട് പറഞ്ഞു. പത്തിലധികം പേർ കയറിയിരുന്ന മരക്കൊമ്പ് ജനക്കൂട്ടത്തിന് ഇടയിലേക്ക് ഒടിഞ്ഞുവീണതാണ് തിക്കും തിരക്കിനും ആളുകൾ ചിതറിയോടുന്നതിനും കാരണമായതെന്ന് സ്ഥലത്തുണ്ടായിരുന്ന പൊലീസ് ഉദ്യോഗസ്ഥൻ പറഞ്ഞു. ഇതോടെ കരൂർ ദുരന്തഭൂമിയായി. പ്രസംഗം അവസാനിപ്പിച്ച ശേഷം വിജയ് സ്ഥലത്തുനിന്ന് മടങ്ങി.

നാലു കാരണങ്ങളാൽ ദുരന്തമുണ്ടായെന്നാണ് പ്രാഥമിക നിഗമനം. കാരവനിൽ ജനങ്ങളെ അഭിവാദ്യം ചെയ്തതിനു ശേഷം മുകളിലേക്കു തുറന്നിരുന്ന വാതിൽ അടച്ച് വിജയ് പോയത് (കാരവന്റെ വാതിൽ അടച്ചതോടെ, ഇനി പ്രിയപ്പെട്ട നടനെ കാണാനാവില്ലെന്ന് അതുവരെ കാത്തിരുന്ന പലരും കരുതി), നാമക്കലിൽനിന്ന് കരൂരിലേക്ക് നൂറുകണക്കിന് ആരാധകർ വിജയ്‌യുടെ വാഹനത്തെ പിന്തുടർന്നത്, സംഘാടകരുടെ തെറ്റായ അനൗൺസ്മെന്റ്, ജനക്കൂട്ടത്തിനിടയിലേക്ക് മരത്തിന്റെ ശിഖരം ഒടിഞ്ഞു വീണത്.

അതേസമയം ദുരന്തത്തിൽ മരിച്ച 39 പേരുടെ പോസ്റ്റ്‌മോർട്ടം നടപടികൾ പൂർത്തിയാക്കി മൃതദേഹങ്ങൾ ബന്ധുക്കൾക്ക് കൈമാറി. സംഭവവുമായി ബന്ധപ്പെട്ട് ടിവികെ ജനറൽ സെക്രട്ടറി എൻ. ആനന്ദ്, കരൂർ ജില്ലാ സെക്രട്ടറി മതിയഴകൻ ഉൾപ്പെടെ നാല് പേർക്കെതിരെ പൊലീസ് കേസെടുത്തു. കേസ് രജിസ്റ്റർ ചെയ്തതിന് പിന്നാലെ മതിയഴകൻ ഒളിവിലാണ്. ഇദ്ദേഹത്തിന്റെ ഫോൺ സ്വിച്ച് ഓഫാണെന്ന് പൊലീസ് അറിയിച്ചു.