നടൻ വിജയ് യുടെ രാഷ്ട്രീയ പാർട്ടിയായ തമിഴക വെട്രി കഴകം (ടിവികെ) ത്തിന്റെ റാലിയുമായി ബന്ധപ്പെട്ട് കരൂരിലുണ്ടായ സംഭവത്തിൽ പൊലീസിന് വീഴ്ചയില്ലെന്ന് തമിഴ്നാട്ടിലെ ക്രമസമാധാന ചുമതലയുള്ള എഡിജിപി ഡേവിഡ്‌സൺ ദേവാശിർവാദം. ആളുകൾ അധികമാണെന്ന് TVK നേതാക്കളെ അറിയിച്ചിരുന്നുവെന്നും എന്നാൽ നേതാക്കൾ അതൊന്നും മുഖവിലയ്ക്കെടുത്തില്ലെന്നും പോലീസ്. കുഴഞ്ഞുവീണവരെ ആശുപത്രിയിൽ എത്തിക്കാൻ കഴിയാത്ത വിധമുള്ള ജനക്കൂട്ടമായിരുന്നു. ഹൈ റിസ്ക് കാറ്റഗറി എന്ന് വിശേഷിപ്പിക്കുന്ന കൂട്ടമാണുണ്ടായതെന്നും പൊലീസ്.
തമിഴക വെട്രി കഴകം (ടിവികെ) പരിപാടിക്ക് അപേക്ഷ നൽകിയത് മാർച്ച് 23-നാണ്. ആദ്യം ആവശ്യപ്പെട്ട സ്ഥലം ലൈറ്റ് ഹൗസ് റൗണ്ട് ആയിരുന്നു. എന്നാൽ, തൊട്ടടുത്ത് നദിയും പെട്രോൾ പമ്പും ഉണ്ടായിരുന്ന ഈ സ്ഥലം കൂടുതൽ അപകടസാധ്യതയുള്ളതും ഇത്രയധികം ആളുകൾക്ക് ഒരുമിച്ചു കൂടാൻ കഴിയാത്തതും ആയതിനാൽ ആദ്യ അപേക്ഷ തള്ളി. രണ്ടാമത് പരിപാടി നടത്താൻ അപേക്ഷ നൽകിയ മാർക്കറ്റ് വളരെ ചെറിയ സ്ഥലം ആയതുകൊണ്ട് ആ അപേക്ഷയും നിരസിച്ചു. സാധാരണയായി രാഷ്ട്രീയ പാർട്ടികളുടെ പരിപാടികളിൽ 12,000 മുതൽ 15,000 പേർ വരെയാണ് പങ്കെടുക്കാറുള്ളത്. ഈ കണക്ക് പരിഗണിച്ചാണ് ഒടുവിൽ വേലുച്ചാമിപുരത്ത് പരിപാടിക്ക് അനുമതി നൽകിയതെന്ന് അദ്ദേഹം പ്രതികരിച്ചു. വേലുച്ചാമിപുരത്ത് പരിപാടി നടത്താൻ അപേക്ഷ നൽകിയത് വെള്ളിയാഴ്ചയാണ്.
സുരക്ഷയ്ക്കായി 20 പേർക്ക് ഒരു പോലീസ് ഉദ്യോഗസ്ഥൻ എന്ന നിലയിലാണ് പോലീസിനെ വിന്യസിച്ചത്. തൃച്ചിറപ്പള്ളിയിൽ 650 പേരെയും, പെരുമ്പാവൂരിൽ 480 പേരെയും, നാഗപട്ടണത്ത് 410 പേരെയും ആണ് വിന്യസിച്ചത്. പോലീസ് കൃത്യമായ നിർദ്ദേശം നൽകിയതിനെത്തുടർന്നാണ് ആംബുലൻസുകൾ എത്തിച്ചത്. എന്നാൽ പരിപാടിക്കിടെ കല്ലേറ് ഉണ്ടായിട്ടില്ലെന്നും എഡിജിപി വ്യക്തമാക്കി.
ഹൈ റിസ്ക് കാറ്റഗറി എന്ന് വിശേഷിപ്പിക്കുന്ന കൂട്ടമാണുണ്ടായത്. നാമക്കലിലും കരൂരിലും വിജയ് എത്താൻ വൈകി. കുഴഞ്ഞുവീണവരെ ആശുപത്രിയിൽ എത്തിക്കാൻ കഴിയാത്ത വിധം വലിയ ജനക്കൂട്ടമായിരുന്നു അവിടെ. ആളുകൾ അധികമാണെന്ന വിവരം ടിവികെ നേതാക്കളെ അറിയിച്ചിരുന്നു. ജനക്കൂട്ടത്തിൽ നിന്ന് 15 മീറ്റർ അകന്ന് പ്രസംഗിക്കണമെന്ന് പോലീസ് ആവശ്യപ്പെട്ടെങ്കിലും നേതാക്കൾ അത് കേട്ടില്ല. നല്ല കവറേജ് ലഭിക്കാൻ മുന്നിൽ നിന്ന് സംസാരിക്കണം എന്ന് നേതാക്കൾ പറഞ്ഞതായും എഡിജിപി കൂട്ടിച്ചേർത്തു. പ്രഭാതഭക്ഷണം പോലും കഴിക്കാതെ നിന്നിരുന്നവരാണ് കൂട്ടത്തിലുണ്ടായിരുന്നത്. ഇവർക്ക് ഭക്ഷണമോ വെള്ളമോ ലഭിച്ചില്ലെന്നും എഡിജിപി വ്യക്തമാക്കി.