ഉത്തർപ്രദേശ്: കനൗജിൽ, കല്യാണ വിരുന്നിൽ ഒരു ചിക്കൻ പീസ് അധികമായി ചോദിച്ചതിനെത്തുടർന്നുണ്ടായ കൂട്ടത്തല്ലിൽ 15 വയസ്സുകാരന് ദാരുണാന്ത്യം. വെള്ളിയാഴ്ച രാത്രിയാണ് സംഭവം. വിരുന്നിനിടെ 15 വയസ്സുകാരന്റെ 65 വയസ്സുള്ള മുത്തച്ഛൻ ഒരു ചിക്കൻ കാൽ അധികമായി ചോദിച്ചതോടെയാണ് പ്രശ്‌നങ്ങൾ തുടങ്ങിയത്. 65കാരനെ വിരുന്ന് നടത്തിയവർ പരസ്യമായി പരിഹസിക്കുകയും അപമാനിക്കുകയും ചെയ്യാൻ ശ്രമിച്ചപ്പോൾ, 15 വയസ്സുകാരൻ ഇതിനെ ചോദ്യം ചെയ്തു.

പിന്നാലെ അക്രമി സംഘം കൗമാരക്കാരനെ ക്രൂരമായി മർദിക്കുകയായിരുന്നു. നെഞ്ചിലും പുറത്തും ഇഷ്ടിക കൊണ്ട് ആക്രമിച്ചതിനെ തുടർന്നാണ് 15കാരൻ കൊല്ലപ്പെട്ടത്. ഗുരുതരമായി പരിക്കേറ്റ് തളർന്നുവീണ കുട്ടിയെ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല. ആക്രമണത്തിൽ പരിക്കേറ്റ 15 വയസ്സുകാരനെ ആശുപത്രിയിലേക്ക് മാറ്റിയതിന് പിന്നാലെ പ്രതികൾ വിവാഹ വീട്ടിൽ നിന്ന് രക്ഷപ്പെട്ടു. സംഭവത്തിൽ പൊലീസ് അന്വേഷണം ആരംഭിച്ചു.

അക്രമത്തിൽ 15 വയസ്സുകാരന്റെ പിതാവിനും ഒരു ഉറ്റബന്ധുവിനും പരിക്കേറ്റിട്ടുണ്ട്. കനൗജ് പൊലീസ് സൂപ്രണ്ട് വിനോദ് കുമാർ, സർക്കിൾ ഇൻസ്‌പെക്ടർ തിർവ കുൽവീർ സിംഗ്, ഇൻസ്‌പെക്ടർ ഇൻ ചാർജ് സഞ്ജയ് കുമാർ ശുക്ല എന്നിവരുൾപ്പെടെയുള്ള ഉദ്യോഗസ്ഥർ സംഭവസ്ഥലത്തെത്തി, കൂടുതൽ പ്രതിഷേധങ്ങളിലേക്ക് പോകാതിരിക്കാനുള്ള മുൻകരുതലുകൾ സ്വീകരിച്ചു.