മധ്യപ്രദേശ്: ധാർ ജില്ലയിൽ അഞ്ച് വയസ്സുകാരനെ അമ്മയുടെ മുന്നിൽ വെച്ച് തലയറുത്ത് കൊന്നു. പിന്നാലെ ഈ ക്രൂരകൃത്യം ചെയ്ത പ്രതിയെ നാട്ടുകാർ തല്ലിക്കൊന്നു. അഞ്ച് വയസ്സുകാരനായ വികാസാണ് കൊല്ലപ്പെട്ടത്. കുട്ടിയും അമ്മയും കാലു സിഗ് എന്നയാളുടെ വീട്ടിലാണ് താമസിച്ചിരുന്നത്. അമ്മയുടെ അടുത്തിരിക്കുകയായിരുന്ന കുട്ടിയെ, വീട്ടിലേക്ക് അതിക്രമിച്ചു കയറിയ അക്രമി തലയറുത്തു കൊല്ലുകയായിരുന്നു എന്നാണ് എൻഡിടിവി റിപ്പോർട്ട്. മഹേഷ് എന്ന 25 വയസ്സുകാരനാണ് പ്രതി. ഇയാൾ ഇരുചക്രവാഹനത്തിൽ എത്തിയാണ് ആക്രമണം നടത്തിയതെന്ന് ദൃക്‌സാക്ഷികൾ മൊഴി നൽകി.

വീട്ടിലെത്തിയ മഹേഷ് അവിടെയുണ്ടായിരുന്ന മൂർച്ചയുള്ള ഉപകരണം ഉപയോഗിച്ച് വികാസിന്റെ കഴുത്ത് ഉടലിൽ നിന്നും മുറിച്ചുമാറ്റി. തുടർന്ന് കുട്ടിയുടെ ശരീരത്തിൽ പരിക്കേൽപ്പിക്കുകയും വികൃതമാക്കുകയും ചെയ്തു. പ്രതിയെ പ്രദേശവാസികൾക്കോ കുടുംബത്തിനോ മുൻപ് പരിചയമില്ലായിരുന്നു. ഇയാൾക്ക് മാനസിക അസ്ഥിരത ഉണ്ടായിരുന്നതായി റിപ്പോർട്ടിൽ പറയുന്നു.

കൊലപാതകം നടത്തിയ ശേഷം രക്ഷപ്പെടാൻ ശ്രമിച്ച മഹേഷിനെ നാട്ടുകാർ പിടികൂടി. പോലീസ് എത്തുന്നതിനു മുമ്പ് നാട്ടുകാർ ഇയാളെ ക്രൂരമായി മർദ്ദിച്ചു. ആശുപത്രിയിലേക്ക് കൊണ്ടുപോകുന്നതിനിടെയാണ് ഇയാൾ മരിച്ചത്. പോസ്റ്റ്‌മോർട്ടത്തിനു ശേഷമേ മരണകാരണം കൃത്യമായി വ്യക്തമാവുകയുള്ളൂ എന്ന് പോലീസ് അറിയിച്ചു.