തിരുവനന്തപുരം: ശബരിമല സംരക്ഷണ സംഗമത്തിന് പിന്നാലെ, സംഘപരിവാർ സംഘടനകൾ സംസ്ഥാനത്ത് സന്യാസി യാത്ര സംഘടിപ്പിക്കുന്നു. രണ്ടായിരത്തിലധികം സന്യാസിമാരെ പങ്കെടുപ്പിച്ചുകൊണ്ട് ഒക്ടോബർ 7 മുതൽ 21 വരെ കാസർഗോഡ് മുതൽ തിരുവനന്തപുരം വരെയാണ് യാത്ര നടക്കുക.

തിരുവനന്തപുരത്ത് നടന്ന സ്വാഗതസംഘം രൂപീകരണത്തിൽ വെള്ളാപ്പള്ളി നടേശന്റെ ഭാര്യ പ്രീതി നടേശൻ ഉൾപ്പെടെയുള്ളവർ പങ്കെടുത്തു. എൻഎസ്എസ്, എസ്എൻഡിപി, വിശ്വകർമ്മ സഭ എന്നിവയുടെ വനിതാ പ്രതിനിധികൾ ജില്ലകൾതോറുമുള്ള സ്വീകരണ പരിപാടികളിൽ പങ്കെടുക്കുമെന്ന് ഭാരവാഹികൾ അറിയിച്ചു.

സന്യാസിമാരുടെ സംഘടനയായ മാർഗനിർദേശക് മണ്ഡലാണ് 'ധർമ്മ സന്ദേശ യാത്ര' എന്ന പേരിൽ ഈ യാത്ര സംഘടിപ്പിക്കുന്നത്. കേരളത്തിൽ ഇതാദ്യമായാണ് ഇത്തരമൊരു സന്യാസി യാത്ര. കേരളത്തിൽ നിന്നുള്ള സന്യാസിവര്യന്മാർക്ക് പുറമെ ഉഡുപ്പി, ദക്ഷിണ കന്നഡ എന്നിവിടങ്ങളിലെ ക്ഷേത്രങ്ങളിലെ മുഖ്യസ്ഥൻമാർ, ജനപ്രതിനിധികൾ എന്നിവരും യാത്രയിൽ അണിചേരും. 'കേരളം കേരളത്തനിമയിലേക്ക്' എന്ന മുദ്രാവാക്യം ഉയർത്തിപ്പിടിച്ചാണ് യാത്ര. നൂറുകണക്കിന് വാഹനങ്ങൾ യാത്രക്ക് അകമ്പടി സേവിക്കും.

സാഹിത്യകാരൻ സി. രാധാകൃഷ്ണനാണ് സ്വാഗതസംഘം ചെയർമാൻ. വിശ്വ ഹിന്ദു പരിഷത്തിന്റെ ജനറൽ സെക്രട്ടറി അനിൽ വിളയിലാണ് ട്രഷറർ. മറ്റു ഭാരവാഹികളെല്ലാം സന്യാസിമാരാണ്. എല്ലാ ജില്ലകളിലും ക്ഷണിക്കപ്പെട്ട സദസ്സുകൾക്ക് മുന്നിൽ സെമിനാറുകളും ഉച്ചയ്ക്ക് ശേഷം പൊതുയോഗങ്ങളും സ്വീകരണ പരിപാടികളും ആസൂത്രണം ചെയ്തിട്ടുണ്ട്.