പാലക്കാട്: ഷാഫി പറമ്പിൽ എംഎൽഎക്കെതിരെ ഗുരുതര ആരോപണവുമായി സിപിഎം പാലക്കാട് ജില്ലാ സെക്രട്ടറി ഇ.എൻ. സുരേഷ് ബാബു. ഭംഗിയുള്ള സ്ത്രീകളെ കണ്ടാൽ ഷാഫി ഉടൻ ബാംഗ്ലൂരിലേക്ക് ട്രിപ്പ് വിളിക്കുമെന്നാണ് സുരേഷ് ബാബുവിന്റെ ആരോപണം. ഷാഫിയും രാഹുലും ഈ കാര്യത്തിൽ കൂട്ടുകച്ചവടം നടത്തുന്നവരാണെന്നും, സ്ത്രീ വിഷയത്തിൽ രാഹുലിന്റെ ഹെഡ്മാസ്റ്ററാണ് ഷാഫി പറമ്പിലെ എന്നും സുരേഷ് ബാബു പരിഹസിച്ചു.
രാഹുൽ മാങ്കൂട്ടത്തിലിനെ ഒരു തരത്തിലും അംഗീകരിക്കില്ലെന്നും, അയാളെ കോൺഗ്രസിൽ നിന്ന് പുറത്താക്കി ശക്തമായ നടപടി സ്വീകരിക്കണമെന്നും സുരേഷ് ബാബു ആവശ്യപ്പെട്ടു. രാഹുൽ മാങ്കൂട്ടത്തിൽ രാജിവെക്കണമെന്ന് ഷാഫി പറമ്പിൽ പറയാൻ തയ്യാറാകുമോ എന്നും, ഈ വിഷയത്തിൽ ഷാഫിയും രാഹുലും കൂട്ടുകച്ചവടത്തിലാണെന്നും സുരേഷ് ബാബു ആരോപിച്ചു.
"ഭംഗിയുള്ള ആരെയെങ്കിലും കണ്ടാൽ, ബാംഗ്ലൂരിൽ ട്രിപ്പടിക്കാൻ ഷാഫി ചോദിക്കുമെന്നാണ് ഞാൻ കേട്ടത്. അതുകൊണ്ട് രാഹുലിനെതിരെ ഈ ഹെഡ്മാഷ് എന്തെങ്കിലും മിണ്ടുമോ? അതിലും വലിയ അധ്യാപകരാണ് മുകളിലുള്ളത്. അതുകൊണ്ടാണ് വലിയ നേതാക്കൾ ഇവർക്കെതിരെ ഒന്നും മിണ്ടാത്തത്. രാഹുലിനെ പ്രതിപക്ഷ നേതാവ് വി.ഡി. സതീശൻ സസ്പെൻഡ് ചെയ്തതിന് പിന്നിലും ഒരു കാരണമുണ്ട്. വന്ന് വന്ന് മുറത്തിൽ കൊത്തിയപ്പോഴാണ് നടപടിയുണ്ടായത്. അത് എന്താണെന്ന് വഴിയെ അറിയാം", സുരേഷ് ബാബു കൂട്ടിച്ചേർത്തു.