തമിഴ്‌നാട് സർക്കാരിന്റെ എം.എസ്. സുബലക്ഷ്മി പുരസ്കാരം ഗാനഗന്ധർവ്വൻ കെ.ജെ. യേശുദാസിന് ലഭിച്ചു. ഇതോടൊപ്പം 2021, 2022, 2023 വർഷങ്ങളിലെ കലൈമാമണി പുരസ്കാരങ്ങളും പ്രഖ്യാപിച്ചു. 2021-ലെ കലൈമാമണി പുരസ്കാരത്തിന് നടൻ എസ്.ജെ. സൂര്യ, നടി സായ് പല്ലവി, സംവിധായകൻ ലിങ്കുസ്വാമി എന്നിവർ അർഹരായി.

2022-ലെ കലൈമാമണി പുരസ്‌കാരങ്ങൾ നടൻ വിക്രം പ്രഭുവിനും ഗാനരചയിതാവ് വിവേകിനും ലഭിച്ചു. 2023-ലെ പുരസ്‌കാരങ്ങൾ നടന്മാരായ മണികണ്ഠൻ, ജോർജ് ആര്യൻ, സംഗീത സംവിധായകൻ അനിരുദ്ധ് രവിചന്ദ്രൻ, ഗായിക ശ്വേത മോഹൻ, ഡാൻസ് കൊറിയോഗ്രാഫർ സാന്റി മാസ്റ്റർ എന്നിവർക്കാണ്.

തമിഴ്‌നാട് സർക്കാരിന്റെ ഏറ്റവും വലിയ പുരസ്‌കാരങ്ങളിലൊന്നായ കലൈമാമണി പുരസ്‌കാരങ്ങൾ ഒക്ടോബറിൽ നടക്കുന്ന ചടങ്ങിൽ തമിഴ്‌നാട് മുഖ്യമന്ത്രി എം.കെ. സ്റ്റാലിൻ സമ്മാനിക്കും.