കോൺഗ്രസിനെ വീണ്ടും വിവാദത്തിലാക്കി ഇന്ത്യൻ ഓവർസീസ് കോൺഗ്രസ് തലവൻ സാം പിത്രോദയുടെ പ്രസ്താവന. അയൽരാജ്യങ്ങളിൽ ശ്രദ്ധ കേന്ദ്രീകരിക്കുന്നതാകണം കോൺഗ്രസിന്റെ വിദേശനയമെന്നും, പാകിസ്താൻ സന്ദർശിച്ചപ്പോൾ സ്വന്തം വീട്ടിലെത്തിയതുപോലെയാണ് തനിക്ക് തോന്നിയതെന്നും അദ്ദേഹം പറഞ്ഞു.

പാകിസ്താൻ, നേപ്പാൾ, ബംഗ്ലാദേശ് തുടങ്ങിയ രാജ്യങ്ങൾ സന്ദർശിച്ചപ്പോൾ ഒരിക്കലും ഒരു വിദേശരാജ്യത്താണെന്ന് തോന്നിയിട്ടില്ലെന്ന് സാം പിത്രോദ ഐ.എ.എൻ.എസിന് നൽകിയ അഭിമുഖത്തിൽ പറഞ്ഞു. ആ രാജ്യങ്ങൾ എല്ലായ്പ്പോഴും തനിക്ക് 'സ്വദേശം പോലെയാണ്' അനുഭവപ്പെട്ടതെന്നും അദ്ദേഹം കൂട്ടിച്ചേർത്തു.

''എന്റെ അഭിപ്രായത്തിൽ, നമ്മുടെ(കോൺഗ്രസ്) വിദേശനയം ആദ്യം നമ്മുടെ അയൽരാജ്യങ്ങളിൽ ശ്രദ്ധ കേന്ദ്രീകരിക്കണം. അയൽക്കാരുമായുള്ള ബന്ധം മെച്ചപ്പെടുത്താൻ നമുക്ക് കഴിയുമോ? ഞാൻ പാകിസ്താനിലും ബംഗ്ലാദേശിലും നേപ്പാളിലും പോയിട്ടുണ്ട്, അവിടെയെല്ലാം എനിക്ക് സ്വന്തം വീട്ടിലെത്തിയതുപോലെയാണ് തോന്നിയത്. ഒരു വിദേശരാജ്യത്താണെന്ന് എനിക്ക് ഒരിക്കലും തോന്നിയിട്ടില്ല.'' - സാം പിത്രോദ പറഞ്ഞതായി ഐ.എ.എൻ.എസ് റിപ്പോർട്ട് ചെയ്തു.

സാം പിത്രോദയുടെ വിവാദ പരാമർശത്തിൽ പ്രതികരിച്ച് ബിജെപി നേതാവ് പ്രദീപ് ഭണ്ഡാരി കോൺഗ്രസിനെ വിമർശിച്ചു. ''26/11 മുംബൈ ഭീകരാക്രമണത്തിന് ശേഷവും യു.പി.എ. സർക്കാർ പാകിസ്താനെതിരെ ശക്തമായ നടപടിയെടുക്കാത്തതിൽ അത്ഭുതമില്ല'' എന്ന് അദ്ദേഹം പറഞ്ഞു.