വാഷിംഗ്ടൺ ഡി.സി.: ലോക മലയാളി കൗൺസിലിൻ്റെ (WMC) പുതുതായി തിരഞ്ഞെടുക്കപ്പെട്ട ഗ്ലോബൽ പ്രസിഡൻ്റ് ഡോ. ബാബു സ്റ്റീഫനെയും ഗ്ലോബൽ ചെയർമാൻ തോമസ് കോട്ടയ്ക്കലിനെയും ആദരിക്കാൻ ഗ്രേറ്റർ വാഷിംഗ്ടൺ മേഖലയിലെ മലയാളി സമൂഹം ഒത്തുകൂടി. കൊളംബിയയിലെ മേരിലാൻഡിലെ ഇൻ്റർഫെയ്ത്ത് സെൻ്ററിൽ നടന്ന ഈ പരിപാടി, നാല് പ്രമുഖ മലയാളി സംഘടനകളായ കേരളൈറ്റ്സ് ഓഫ് ബാൾട്ടിമോർ (KOB), കേരള അസോസിയേഷൻ ഓഫ് ഗ്രേറ്റർ വാഷിംഗ്ടൺ (KAGW), കേരള കൾച്ചറൽ സൊസൈറ്റി (KCS), ഗ്രേറ്റർ റിച്ച്മണ്ട് അസോസിയേഷൻ ഓഫ് മലയാളീസ്(ഗ്രാമം) എന്നിവയുടെ സംയുക്ത സംരംഭമായിരുന്നു.
വേൾഡ് മലയാളി കൗൺസിൽ ബാൾട്ടിമോർ പ്രൊവിൻസ് പ്രസിഡൻ്റ് ജിജോ അലപാട്ട് ചടങ്ങിന് തുടക്കമിട്ടുകൊണ്ട്, അതിഥികളായ ഡോ. ജോർജ് ജേക്കബ്, ഡോ. മറിയാമ്മ ജേക്കബ്, തോമസ് മാത്യു, ഫിലിപ്പ് മാത്യു, ഇന്ത്യൻ എംബസിയിലെ കൗൺസിലർ ദേബേഷ് കുമാർ ബെഹെറ ഐപിഎസ് എന്നിവരെ ഹൃദയപൂർവ്വം സ്വാഗതം ചെയ്തു. ആഗോള മലയാളി പ്രവാസികളെ ബന്ധിപ്പിക്കുന്ന ദർശനവും പ്രചോദനാത്മകമായ നേതൃത്വവുമുള്ള ഡോ. സ്റ്റീഫനെ ആദരിക്കാനായി അമേരിക്കയിലെ മലയാളികൾ ഒത്തുകൂടിയപ്പോൾ, അത് അഭിമാനവും ഐക്യവും നിറഞ്ഞ ഒരു സന്ധ്യയായി മാറി.
വേൾഡ് മലയാളി കൗൺസിൽ അമേരിക്ക റീജിയൻ പ്രസിഡൻ്റ് ജെയ്സൺ മണ്ണിൽ, സംഘടനയുടെ പ്രധാന ലക്ഷ്യങ്ങൾ വിശദീകരിച്ചു. ചാരിറ്റബിൾ, സാംസ്കാരികം, സന്നദ്ധ സേവനം എന്നീ മേഖലകളിൽ പ്രവർത്തിച്ച് ലോകമെമ്പാടുമുള്ള മലയാളികളെ ഒരുമിപ്പിക്കുക എന്നതാണ് സംഘടനയുടെ ലക്ഷ്യം. പ്രാദേശിക സംഘടനകളായ ഫോക്കാന, ഫൊമായ് എന്നിവയുമായി സഹകരിച്ച് വേൾഡ് മലയാളി കൗൺസിൽ ഒരുമയുടെ കേന്ദ്രമായിട്ടാണ് പ്രവർത്തിക്കുന്നതെന്നും അദ്ദേഹം ഊന്നിപ്പറഞ്ഞു.
ഡോ. സ്റ്റീഫന്റെ കാഴ്ചപ്പാടുകൾ വിശദീകരിച്ചുകൊണ്ട് ജെയ്സൺ മണ്ണിൽ വേൾഡ് മലയാളി കൗൺസിലിന്റെ പുതിയ പദ്ധതികൾ പ്രഖ്യാപിച്ചു. 100 നഴ്സിങ് വിദ്യാർത്ഥികൾക്കായി ഒരു കോടി രൂപയുടെ സ്കോളർഷിപ്പ് ഫണ്ട്, കൊച്ചിയിലെ മറൈൻ ഡ്രൈവിൽ പുതിയ ഓഫീസ്, ഗ്ലോബൽ യുവ വികസന പരിപാടി എന്നിവ ഇതിൽ ഉൾപ്പെടുന്നു. ഈ പദ്ധതികൾ വിദ്യാഭ്യാസം, നേതൃത്വ വികസനം, ശാക്തീകരണം എന്നീ മേഖലകളിലൂടെ മലയാളി പ്രവാസി സമൂഹത്തെ ശക്തിപ്പെടുത്താനുള്ള സംഘടനയുടെ പ്രതിബദ്ധതയാണ് കാണിക്കുന്നതെന്നും വ്യക്തമാക്കി.
തൻ്റെ പ്രസംഗത്തിൽ, വേൾഡ് മലയാളി കൗൺസിൽ ഗ്ലോബൽ ചെയർമാനായി നിയമിതനായ തോമസ് കോട്ടയ്ക്കൽ, സംഘടനയുടെ സ്ഥാപക ദർശനങ്ങളെക്കുറിച്ച് സംസാരിച്ചു. വേൾഡ് മലയാളി കൗൺസിലിൻ്റെ ദൗത്യം അതുല്യമാണെന്ന് അദ്ദേഹം പറഞ്ഞു. "നാം ഇവിടെ മറ്റുള്ളവരെ പകർത്താനല്ല, ലോകമെമ്പാടുമുള്ള മലയാളികളെ നെറ്റ്‌വർക്കിങ്ങിന്റെയും ശാക്തീകരണത്തിൻ്റെയും വഴിയിലൂടെ ഒരുമിപ്പിക്കുന്ന പുതിയൊരു പാത സൃഷ്ടിക്കുകയാണ്," അദ്ദേഹം പറഞ്ഞു. വേൾഡ് മലയാളി കൗൺസിലിലെ ഓരോ സ്ഥാനവും ഉത്തരവാദിത്തത്തെയും പ്രതിബദ്ധതയെയും സമർപ്പണത്തെയും പ്രതിനിധീകരിക്കുന്നുവെന്നും കൂട്ടിച്ചേർത്തു.
പുതിയ ഗ്ലോബൽ പ്രസിഡൻ്റ് ഡോ. ബാബു സ്റ്റീഫനെ അഭിനന്ദിച്ചുകൊണ്ട് തോമസ് കോട്ടയ്ക്കൽ പറഞ്ഞു: "കൗൺസിലിൻ്റെ ആഗോള വ്യാപതി മാറ്റിയെഴുതുന്ന മഹത്തായ നേതാവിനൊപ്പം പ്രവർത്തിക്കാൻ നമുക്ക് ഭാഗ്യമുണ്ട്." വേദിയിലെത്തിയ ഡോ. ബാബു സ്റ്റീഫനെ ഹർഷാരവത്തോടെയാണ് അംഗങ്ങൾ സ്വീകരിച്ചത്. വേൾഡ് മലയാളി കൗൺസിൽ ബാൾട്ടിമോർ പ്രൊവിൻസ് ചെയർമാൻ വിജയ് പട്ടമ്മാടിയും ജിജോ അലപാട്ടും ചേർന്ന് അദ്ദേഹത്തിന് പൊന്നാട അണിയിച്ച് ആദരിച്ചു.
വിജയ് പട്ടമ്മാടിയോടും ജിജോ അലപ്പാട്ടിനോടും നന്ദി രേഖപ്പെടുത്തിക്കൊണ്ടാണ് ഡോ. ബാബു സ്റ്റീഫൻ തൻ്റെ പ്രസംഗം ആരംഭിച്ചത്. ഫോക്കാനയുടെ പ്രസിഡൻ്റായിരുന്ന കാലത്ത് അവർ നൽകിയ പിന്തുണയ്ക്ക് അദ്ദേഹം പ്രത്യേകം നന്ദി പറഞ്ഞു. മുഖ്യപ്രഭാഷണത്തിൽ അദ്ദേഹം സമൂഹത്തോട് തങ്ങളുടെ വേരുകൾ മറക്കരുതെന്ന് ഓർമ്മിപ്പിച്ചു, "നമ്മുടെ അടിത്തറയാണ് നമ്മുടെ ശക്തി," എന്നും കൂട്ടിച്ചേർത്തു. ഏഷ്യൻ-അമേരിക്കൻ കുട്ടികൾ മിടുക്കരാണെന്നും, വലിയ സ്വപ്നങ്ങൾ കാണാനും ആഗ്രഹിച്ചതെന്തും ആകാനും അവർക്ക് കഴിവുണ്ടെന്നും അദ്ദേഹം പറഞ്ഞു. "എന്നാൽ വന്ന വഴി മറക്കരുത്," എന്നും അദ്ദേഹം ഓർമ്മിപ്പിച്ചു. അമേരിക്ക വലിയ അവസരങ്ങൾ നൽകുന്ന നാടാണെന്നും അതിൻ്റെ ഭാഗമായിരിക്കുന്നതിൽ അഭിമാനിക്കണമെന്നും പറഞ്ഞുകൊണ്ട് അദ്ദേഹം പ്രസംഗം അവസാനിപ്പിച്ചു.
ഇന്ത്യൻ എംബസി കൗൺസിലർ ദേബേഷ് കുമാർ ബെഹെറ ഐ.പി.എസ്, ഡോ. സ്റ്റീഫനെ പ്രശംസിച്ചുകൊണ്ട് "ഊർജ്ജസ്വലരായ മലയാളി സമൂഹത്തിൻ്റെ അടിത്തറയായ വ്യക്തിയാണ്" എന്ന് വിശേഷിപ്പിച്ചു. ഇന്ത്യൻ കാര്യങ്ങൾക്കും സമൂഹ വികസനത്തിനുമായി അദ്ദേഹം നൽകിയ പിന്തുണയെക്കുറിച്ചും അദ്ദേഹം പറഞ്ഞു.വേൾഡ് മലയാളി കൗൺസിലിൻ്റെ സ്ഥാപക പിതാക്കന്മാരിൽ ഒരാളായ ഡോ. ജോർജ് ജേക്കബ്, സംഘടനയുടെ ലക്ഷ്യങ്ങൾ വിശദീകരിച്ചു. കേരളത്തിന് പുറത്തുള്ള മലയാളികൾക്ക് ഒരു സംഗമകേന്ദ്രമാവുക, സമൂഹത്തിൻ്റെ സാമ്പത്തിക, സാമൂഹിക സാധ്യതകൾ പ്രയോജനപ്പെടുത്തുക, കുടുംബം, പാരമ്പര്യം, സംസ്കാരം തുടങ്ങിയ മൂല്യങ്ങൾ പ്രോത്സാഹിപ്പിക്കുക എന്നിവയാണ് കൗൺസിലിൻ്റെ പ്രധാന ദൗത്യങ്ങളെന്ന് അദ്ദേഹം പറഞ്ഞു. തലമുറകളെ ബന്ധിപ്പിക്കുന്ന ഒരു ആഗോള മലയാളി നെറ്റ്‌വർക്ക് രൂപപ്പെടുത്തേണ്ടതിന്റെ പ്രാധാന്യത്തെക്കുറിച്ചും, അതിലൂടെ പ്രൊഫഷണൽ വളർച്ചയും സാങ്കേതിക പുരോഗതിയും സാംസ്കാരിക സഹകരണവും സാധ്യമാക്കണമെന്നും അദ്ദേഹം കൂട്ടിച്ചേർത്തു. "ഞാൻ സന്ദർശിക്കുമെന്ന് ഒരിക്കലും പ്രതീക്ഷിക്കാത്ത രാജ്യങ്ങളിലെ മലയാളികളുമായി സൗഹൃദങ്ങൾ സ്ഥാപിക്കാൻ WMC എന്നെ സഹായിച്ചു,".
അതേസമയം, വേൾഡ് മലയാളി കൗൺസിൽ ബാൾട്ടിമോർ പ്രൊവിൻസിൻ്റെ പുതിയ ഭാരവാഹികളുടെ സത്യപ്രതിജ്ഞാ ചടങ്ങും നടന്നു. ഗ്ലോബൽ ചെയർമാൻ ശ്രീ. തോമസ് കോട്ടയ്ക്കൽ സത്യപ്രതിജ്ഞ ചൊല്ലിക്കൊടുത്തു. പ്രസിഡൻ്റായി ജിജോ അലപാട്ട്, ചെയർമാനായി വിജയ് പട്ടമ്മാടി, സെക്രട്ടറി ജോസ്നി സക്കറിയ, ട്രഷറർ ജോസഫ് ഈപ്പൻ എന്നിവരും വിവിധ കമ്മിറ്റികളുടെ സഹ-ചെയർമാന്മാരും സത്യപ്രതിജ്ഞയെടുത്തു.
വിവിധ മലയാളി സംഘടനകളുടെ നേതാക്കൾ ഈ പരിപാടിയിൽ പങ്കെടുത്തു. കേരളൈറ്റ്സ് ഓഫ് ബാൾട്ടിമോർ (KOB) പ്രസിഡൻ്റ് കമലേഷ് മക്കേൽസ്, കേരള കൾച്ചറൽ സൊസൈറ്റി (KCS) മുൻ പ്രസിഡൻ്റ് സുരേഷ് നായർ, കേരള അസോസിയേഷൻ ഓഫ് ഗ്രേറ്റർ വാഷിങ്ടൺ (KAGW) പ്രസിഡൻ്റ്-ഇലക്ട് നാരായണൻ വളപ്പിൽ, വേൾഡ് മലയാളി കൗൺസിൽ റിച്ച്മണ്ട് പ്രൊവിൻസ് ചെയർമാൻ നജീബ് പള്ളത്ത്, വേൾഡ് മലയാളി കൗൺസിൽ നോർത്ത് വിർജീനിയ പ്രൊവിൻസ് പ്രസിഡൻ്റ് സൂസൻ സക്കറിയ എന്നിവർ വേൾഡ് മലയാളി കൗൺസിലിന് (WMC) പിന്തുണ പ്രഖ്യാപിച്ചു. ഐക്യത്തിൻ്റെയും സഹകരണത്തിൻ്റെയും പ്രാധാന്യം വിളിച്ചോതുന്നതായിരുന്നു ഈ ചടങ്ങ്. അടുത്തിടെ അന്തരിച്ച സെബാസ്റ്റ്യൻ കുരിയൻ്റെ ഓർമ്മയ്ക്കായി ഒരു മിനിറ്റ് മൗനാചരണവും നടത്തി.
മാസ്റ്റർ ഓഫ് സെറിമണിയായിരുന്ന ജോസ്നി സക്കറിയ പരിപാടി അവിസ്മരണീയമാക്കി. ക്ലാസിക്കൽ, സമകാലിക നൃത്തങ്ങളും, പ്രാദേശിക കലാകാരന്മാർ ആലപിച്ച ഓണപ്പാട്ടുകളും ചടങ്ങിന് മാറ്റുകൂട്ടി. പരമ്പരാഗത കേരള സദ്യയും ഒരുക്കിയിരുന്നു. വേൾഡ് മലയാളി കൗൺസിലിൻ്റെ പതാകയ്ക്ക് കീഴിൽ ഐക്യത്തിൻ്റെയും സാഹോദര്യത്തിൻ്റെയും ആത്മാവിനെ ഉയർത്തിപ്പിടിച്ച്, ഈ പരിപാടി സമൂഹത്തിന് പ്രചോദനമാകുകയും അവരെ ഒരുമിപ്പിക്കുകയും ചെയ്തു.