ദുബായ്: ഏഷ്യാകപ്പിലെ ഹസ്തദാന വിവാദത്തിനെ തുടർന്ന് യുഎഇയുമായുള്ള കളി ബഹിഷ്കരിക്കാൻ ശ്രമിച്ച പാക്കിസ്ഥാൻ ഒടുവിൽ ഐസിസിക്ക് മുന്നിൽ കീഴടങ്ങി. കളിക്കാൻ ഇറങ്ങില്ലെന്ന് വിരട്ടിയ പാക്ക്‌ ടീം ഐസിസി വടിയെടുത്തതോടെ ഓടിക്കിതച്ച് ഗ്രൗണ്ടിൽ എത്തുകയായിരുന്നു. ഇന്ത്യൻ സമയം എട്ടുമണിക്ക് കളി നടക്കണമെന്നിരിക്കെ പാക്കിസ്ഥാന്റെ ചുവടുമാറ്റത്തെത്തുടർന്ന് 9 മണിക്കാണ് കളി ആരംഭിച്ചത്. കളിക്കളത്തിൽ എത്തിയ പാക്ക് ടീമിനെ വരിഞ്ഞു മുറുക്കി ഇരിക്കുകയാണ് യുഎഇ ബൗളർമാർ. ഇന്ത്യന്‍ വംശജര്‍ നിറഞ്ഞ ടീമാണ് യുഎഇയുടേത്. ടോസ് നേടിയ യുഎഇ, പാകിസ്താനെ ബാറ്റിങ്ങിനയച്ചു. 20 ഓവറിൽ 9 വിക്കറ്റ് നഷ്ടത്തിൽ പാകിസ്താൻ 146 റൺസെടുത്തു.

നാല് ഓവറിൽ 18 റൺസ് മാത്രം വഴങ്ങി നാല് വിക്കറ്റെടുത്ത ജുനൈദ് സിദ്ദിഖും, നാല് ഓവറിൽ 26 റൺസ് വഴങ്ങി മൂന്ന് വിക്കറ്റെടുത്ത സിമ്രൻജീത് സിംഗും ചേർന്നാണ് പാകിസ്താൻ്റെ ബാറ്റിംഗ് തകർത്തത്. പാകിസ്താന് വേണ്ടി 36 പന്തിൽ നിന്ന് മൂന്ന് സിക്സും രണ്ട് ഫോറുമടക്കം 50 റൺസെടുത്ത ഫഖർ സമാനാണ് ഏറ്റവും കൂടുതൽ റൺസ് നേടിയത്. അവസാന ഓവറുകളിൽ തകർത്തടിച്ച ഷഹീൻ അഫ്രീദിയുടെ 14 പന്തിൽ 29 റൺസാണ് പാകിസ്താന് ഭേദപ്പെട്ട സ്കോർ നേടിക്കൊടുത്തത്. രണ്ട് സിക്സും മൂന്ന് ഫോറും അഫ്രീദിയുടെ ഇന്നിംഗ്‌സിലുണ്ടായിരുന്നു.

ഇന്നിംഗ്‌സിൻ്റെ അഞ്ചാം പന്തിൽത്തന്നെ പാകിസ്താൻ്റെ വിക്കറ്റുകൾ വീണുതുടങ്ങി. ക്യാപ്റ്റൻ സൽമാൻ ആഗ 27 പന്തിൽ 20 റൺസും, മുഹമ്മദ് ഹാരിസ് 14 പന്തിൽ 18 റൺസുമെടുത്ത് രണ്ടക്കം കടന്ന മറ്റ് താരങ്ങൾ. മൂന്നാം വിക്കറ്റിൽ ഫഖർ സമാനും സൽമാൻ ആഗയും ചേർന്നെടുത്ത 61 റൺസിൻ്റെ കൂട്ടുകെട്ടാണ് പാകിസ്താനെ വലിയ തകർച്ചയിൽ നിന്ന് രക്ഷിച്ചത്. സയിം അയൂബ് (0), സാഹിബ്സാദ ഫർഹാൻ (5), ഹസൻ നവാസ് (3), ഖുഷ്ദിൽ ഷാ (4) എന്നിവർ പെട്ടെന്ന് പുറത്തായി.