ദുബായ്: ദുബായ് ഇന്റർനാഷണൽ ക്രിക്കറ്റ് സ്റ്റേഡിയത്തിൽ നടക്കുന്ന ഇന്ത്യ-പാകിസ്ഥാൻ ഏഷ്യാ കപ്പ് 2025 മത്സരത്തിന് മുന്നോടിയായി ദുബായ് അധികൃതർ കാണികൾക്ക് കർശനമായ നിർദ്ദേശങ്ങൾ പുറത്തിറക്കി. ടൂർണമെന്റിന്റെ സുരക്ഷ ഉറപ്പാക്കുന്നതിനും അച്ചടക്കം പാലിക്കുന്നതിനും എല്ലാ സഹകരണവും നൽകണമെന്ന് അധികൃതർ അഭ്യർത്ഥിച്ചു.

ദുബായ് പോലീസിലെ ഓപ്പറേഷൻസ് അസിസ്റ്റന്റ് കമാൻഡർ-ഇൻ-ചീഫും ഇവന്റ്‌സ് സെക്യൂരിറ്റി കമ്മിറ്റി (ഇഎസ് സി) ചെയർമാനുമായ മേജർ ജനറൽ സെയ്ഫ് മുഹൈർ അൽ മസ്രൂയിയാണ് സുരക്ഷാ ക്രമീകരണങ്ങൾ അറിയിച്ചത്. സ്റ്റേഡിയത്തിന്റെ സുരക്ഷയ്ക്കായി പ്രത്യേക പോലീസ് യൂണിറ്റുകളെ വിന്യസിച്ചിട്ടുണ്ടെന്നും, നിയമലംഘകർക്കെതിരെ കർശന നടപടിയെടുക്കുമെന്നും അദ്ദേഹം അറിയിച്ചു. കായിക പരിപാടികളുടെ സുരക്ഷ സംബന്ധിച്ചുള്ള ഫെഡറൽ നിയമപ്രകാരമുള്ള പിഴകളെക്കുറിച്ചും അധികൃതർ ഓർമ്മിപ്പിച്ചു.

കർശന ശിക്ഷാ നടപടികൾ

കളിക്കളത്തിലേക്ക് പടക്കങ്ങൾ പോലുള്ള നിരോധിത വസ്തുക്കൾ വലിച്ചെറിയുകയോ കൊണ്ടുവരാൻ ശ്രമിക്കുകയോ ചെയ്താൽ 5,000 ദിർഹം (ഏകദേശം 1.20 ലക്ഷം രൂപ) മുതൽ 30,000 ദിർഹം (ഏകദേശം 7.20 ലക്ഷം രൂപ) വരെ പിഴയും ഒന്നു മുതൽ മൂന്നു മാസം വരെ തടവും ലഭിക്കും.

അക്രമ പ്രവൃത്തികൾ, വസ്തുക്കൾ എറിയുക, വംശീയ വിദ്വേഷം പരത്തുന്ന രീതിയിൽ സംസാരിക്കുക തുടങ്ങിയ കുറ്റകൃത്യങ്ങൾക്ക് 10,000 ദിർഹം (ഏകദേശം 2.40 ലക്ഷം രൂപ) മുതൽ 30,000 ദിർഹം വരെ പിഴയും തടവും ലഭിക്കും.

നിരോധിച്ച വസ്തുക്കൾ

പടക്കങ്ങൾ, ലേസറുകൾ, തീപിടിക്കുന്ന വസ്തുക്കൾ, കുടകൾ, സെൽഫി സ്റ്റിക്കുകൾ, വലിയ ക്യാമറകൾ, മൂർച്ചയുള്ള വസ്തുക്കൾ, വിഷവസ്തുക്കൾ, ബാനറുകൾ, റിമോട്ട് കൺട്രോൾ ഉപകരണങ്ങൾ, സൈക്കിളുകൾ, സ്കേറ്റ്ബോർഡുകൾ, ഗ്ലാസ് വസ്തുക്കൾ, വളർത്തുമൃഗങ്ങൾ എന്നിവയുൾപ്പെടെ നിരവധി വസ്തുക്കൾ സ്റ്റേഡിയത്തിലേക്ക് കൊണ്ടുപോകുന്നത് നിരോധിച്ചിട്ടുണ്ട്.

ടൂർണമെന്റിലെ ഏറ്റവും കൂടുതൽ ആളുകൾ കാണുന്ന മത്സരങ്ങളിലൊന്നായതിനാൽ, കളിക്കാരെയും കാണികളെയും സംരക്ഷിക്കുന്നതിനാണ് ഈ നിയന്ത്രണങ്ങൾ ഏർപ്പെടുത്തിയിരിക്കുന്നതെന്ന് അൽ മസ്രൂയി പറഞ്ഞു. സ്റ്റേഡിയം നിയമങ്ങൾ ലംഘിച്ചാൽ കടുത്ത പ്രത്യാഘാതങ്ങൾ നേരിടേണ്ടിവരുമെന്ന് ദുബായ് പോലീസ് മുന്നറിയിപ്പ് നൽകി.